Vuçiq me Sachsin: Serbia ka potencial për zhvillim më të fuqishëm teknologjik dhe ekonomik

Presidenti i Republikës së Serbisë, Aleksandar Vuçiq, u takua në një mëngjes pune me një nga ekonomistët më të njohur në botë, Jeffrey Sachs, i cili po merr pjesë në Forumin e Parë për Qëndrueshmëri dhe Ndërlidhje, të organizuar nga Oda ekonomike e k Serbisë.

Pas bisedës, Vuçiq theksoi se ishte një nder dhe privilegj të bisedonte me Sachsin, analizat dhe vlerësimet e të cilit, sipas tij, prej dekadash përbëjnë një orientim të rëndësishëm për vendimmarrësit.

“Ishte një nder dhe privilegj i madh të bisedoja me Jeffrey Sachs, një nga ekonomistët më të respektuar në botë, analizat dhe vlerësimet e të cilit prej dekadash shërbejnë si udhërrëfyes i rëndësishëm për vendimmarrësit. Shkëmbyem mendime mbi sfidat më të rëndësishme ekonomike, politike dhe të sigurisë në nivel ndërkombëtar, me theks të veçantë në pozitën e Serbisë në rrethana komplekse gjeopolitike”, shkroi Vuçiq në Instagram.

Temë e veçantë e bisedës ishte zhvillimi i industrisë dhe inteligjencës artificiale, si dhe roli i tyre në formësimin e së ardhmes së botës.

“Zhvillimi i industrisë dhe inteligjencës artificiale dhe roli i tyre kyç në formësimin e së ardhmes së botës, nga transformimi i ekonomisë globale deri te jeta e përditshme e njerëzve, ishte një nga temat kryesore. Theksova potencialin e madh të Serbisë në këto fusha, si një vend që tashmë është pozicionuar si një aktor i rëndësishëm në hartën globale të zhvillimit teknologjik”, tha presidenti i Serbisë.

Vuçiq theksoi gjithashtu rëndësinë e tërheqjes së investimeve, por edhe mundësinë që Serbia të bëhet pjesë e tregut të përbashkët të Bashkimit Evropian.

“Duke folur për perspektivat ekonomike të Serbisë, theksova se, përveç aktiviteteve intensive për tërheqjen e investimeve nga e gjithë bota, vendi ynë ka një mundësi historike për t’u bërë pjesë e tregut të përbashkët të BE-së. Kjo do të hapte rrugën për qarkullimin e lirë të mallrave, shërbimeve, kapitalit dhe njerëzve, duke u mundësuar kompanive vendase të operojnë pa barriera në një treg me më shumë se 450 milionë konsumatorë”, tha Vuçiq.

U diskutua gjithashtu për ruajtjen e stabilitetit politik, pavarësisë në vendimmarrje dhe zhvillimit ekonomik të Serbisë.

“Biseduam edhe për sfidat e ruajtjes së stabilitetit politik, pavarësisë në vendimmarrje dhe zhvillimit ekonomik të vendit tonë, si dhe për nevojën që Serbia të vazhdojë të ndjekë një politikë të përgjegjshme dhe parimore, të hapur për bashkëpunim me të gjithë, duke mbrojtur në mënyrë të vazhdueshme interesat e saj shtetërore dhe kombëtare”, tha ai.

Vuçiq falënderoi veçanërisht profesorin Sachs për përkushtimin e tij ndaj parimeve të së drejtës ndërkombëtare dhe gatishmërinë për të folur në mënyrë të argumentuar dhe të pavarur për çështje të rëndësishme globale.

“E falënderova veçanërisht profesorin Sachs për përkushtimin e tij të vazhdueshëm ndaj parimeve të së drejtës ndërkombëtare dhe për gatishmërinë që të flasë për çështje të rëndësishme globale në mënyrë të argumentuar dhe të pavarur. Dëgjova me shumë vëmendje analizat dhe këshillat e tij, i bindur se nga njerëz me kaq shumë njohuri dhe përvojë gjithmonë mund të mësohet shumë”, shkroi Vuçiq.