Vuçiq me Sholle: SHBA-të të inkurajojnë Prishtinën të përmbushë obligimet e saj

Presidenti i Serbisë, Alleksandar Vuçiq, ka pritur sot Këshilltarin Special në Departamentin e Shtetit, Derek Sholle, i cili po qëndron në Beograd.

“Një bisedë përmbajtësore dhe e hapur me Këshilltarin Special të Departamentit të Shtetit, Derek Sholle”, ka thënë Vuçiq në Instagram.

“Shpreha pritjen që SHBA-ja të njohë përpjekjet e vendit tonë në ruajtjen e paqes dhe stabilitetit në rajon, si dhe të përdorë ndikimin e saj të padyshimtë dhe të inkurajojë Prishtinën që të përmbushë obligimet e saj në përputhje me marrëveshjet e pranuara dhe të nënshkruara, por edhe të vazhdoni dialogun në frymën e sinqeritetit dhe shkëmbimit të hapur të propozimeve për zgjidhjen e sfidave specifike”, shtoi presidenti i Serbisë.

Vizita e Sholles në Beograd është pjesë e turneut të tij në Ballkanin Perëndimor, gjatë të cilit ai tashmë ka vizituar Shkupin dhe Prishtinën.