Vuçiq me Von der Leyen: Stabiliteti dhe politika e përgjegjshme kyçe për të ardhmen e Ballkanit Perëndimor dhe Evropës

Presidenti i Serbisë, Aleksandar Vuçiq, në një bisedë telefonike me presidenten e Komisionit Evropian, Ursula von der Leyen, theksoi se stabiliteti, bashkëpunimi dhe politika e përgjegjshme janë me rëndësi vendimtare për të ardhmen e Ballkanit Perëndimor dhe Evropës.

“Bisedë e mirë dhe e hapur me presidenten e KE-së, Ursula von der Leyen, për çështjet kyçe të marrëdhënieve ndërmjet Serbisë dhe Bashkimit Evropian, si dhe për përparimin e mëtejshëm të vendit tonë në rrugën evropiane”, shkroi Vuçiq në Instagram.

Ai bëri të ditur se gjatë bisedës theksoi përkushtimin e Serbisë për zbatimin e përshpejtuar të reformave thelbësore në fushën e sundimit të ligjit, përmirësimin e sistemit gjyqësor, forcimin e pavarësisë së institucioneve, si dhe zbatimin e ligjeve për mediat dhe paketës së ligjeve reformuese, në përputhje me rekomandimet e Komisionit të Venecias.

Vuçiq theksoi se Serbia vazhdon të punojë me përgjegjësi dhe përkushtim për harmonizimin me standardet evropiane.

“Duke falënderuar presidenten Von der Leyen për angazhimin e saj personal, shpreha pritjen që bashkëpunimi me Komisionin Evropian të vazhdojë të ofrojë mbështetje të qartë për përpjekjet reformuese dhe përshpejtimin e procesit të anëtarësimit të vendit tonë në Bashkimin Evropian”, theksoi presidenti i Serbisë.

Ai shtoi se kanë shkëmbyer mendime edhe për sfidat aktuale rajonale dhe globale.

“Ritheksova se stabiliteti, bashkëpunimi dhe politika e përgjegjshme janë me rëndësi vendimtare për të ardhmen e Ballkanit Perëndimor dhe Evropës”, përfundoi Vuçiq.