Vuçiq me Whitakerin: Për Serbinë është me rëndësi vendimtare ruajtja e sigurisë së popullit serb në Kosovë

Presidenti i Serbisë, Aleksandar Vuçiq, theksoi sot në një bisedë me ambasadorin e Shteteve të Bashkuara të Amerikës pranë NATO-s, Matthew Whitaker, se për Serbinë është me rëndësi vendimtare ruajtja e sigurisë së popullit serb në Kosovë, si dhe vazhdimi i një politike të përgjegjshme dhe serioze që nënkupton dialogun dhe këmbënguljen për respektimin e së drejtës ndërkombëtare dhe të obligimeve të marra.

Vuçiq shkroi në Instagram se me Whitakerin ka biseduar për çështjet më të rëndësishme të sigurisë dhe politikës në rajon, për pozitën e Serbisë në rrethana komplekse gjeopolitike, si dhe për nevojën për të ruajtur paqen dhe stabilitetin në Ballkanin Perëndimor.

“Veçanërisht theksova se për Serbinë është me rëndësi vendimtare ruajtja e sigurisë së popullit tonë në Kosovë dhe Metohi, si dhe vazhdimi i një politike të përgjegjshme dhe serioze që përfshin si dialogun, ashtu edhe këmbënguljen për respektimin e së drejtës ndërkombëtare dhe të obligimeve të marra. Serbia do të vazhdojë të jetë faktor stabiliteti, por gjithmonë do të dijë të mbrojë interesat e saj shtetërore dhe kombëtare”, theksoi Vuçiq.

Ai shtoi se me Whitakerin ka biseduar edhe për përmirësimin e marrëdhënieve ndërmjet Serbisë dhe SHBA-së, si dhe për format e bashkëpunimit që mund të kontribuojnë në një mirëkuptim më të madh të ndërsjellë dhe në ruajtjen e paqes në rajon.

“Jam i bindur se dialogu i hapur është i rëndësishëm, veçanërisht në kohë sfidash të mëdha dhe ndryshimesh në marrëdhëniet ndërkombëtare”, shtoi Vuçiq.