Vuçiq: Ne po e zhvillojmë ushtrinë tonë, Kurti le ta quajë si të dojë

Presidenti i Serbisë, Aleksandar Vuçiq, deklaroi sot se Serbia po e ruan paqen dhe se do të vazhdojë ta zhvillojë ushtrinë e saj, ndërsa Albin Kurti mund t’i quajë këto synime si të dojë.

Duke komentuar pretendimin e Kurtit se rritja e kapaciteteve ushtarake të Serbisë është pjesë e një strategjie më të gjerë, të lidhur me synimet hegjemoniste të Beogradit në rajon dhe veçanërisht ndaj Kosovës, Vuçiq tha se Serbia është ajo që po e ruan paqen.

“Serbia po e ruan paqen. Sikur të kishim reaguar ndaj çdo provokimi të tij, ai prej kohësh do t’i kishte vënë flakën rajonit. Ne nuk e lejojmë këtë, sepse Serbisë i intereson paqja. Jo sepse nuk kujdesemi për popullin tonë, përkundrazi. Kujdesemi shumë. Por përparojmë më shpejt në paqe”, nënvizoi presidenti i Serbisë.

Ai shtoi se Serbia prodhon vetë armatim prej dekadash dhe blen diçka herë pas here, sepse askush nuk i jep asgjë “falas”, siç i japin Kurtit.

“Ajo që i vjen falas, i jepet për synime hegjemoniste dhe për realizimin e politikës antiserbe. Ne nuk do t’ia lejojmë këtë, as atij dhe as dikujt tjetër. Do të vazhdojmë ta zhvillojmë ushtrinë tonë, ndërsa ai mund t’i quajë synimet si të dojë”, tha Vuçiq.