Vuçiq pas takimit me Lajçakun: Kurti dëshiron të pengojë pagesën e pagave dhe pensioneve për serbët, kam kërkuar që të ndalet ajo përpjekje

Presidenti i Serbisë, Aleksandar Vuçiq, ka vlerësuar se njoftimet e Prishtinës për anulimin e transaksioneve të pagesave dhe ndalimin e përdorimit të dinarit janë kërcënimi më serioz dhe më i madh për dialogun e deritanishëm dhe përcolli se ka kërkuar edhe nga përfaqësuesi special i Bashkimit Evropian për dialogun ndërmjet Beogradit dhe Prishtinës, Mirosllav Lajçak, mbështetje për serbët nga Kosova dhe Metohia.

“I kam paralajmëruar dhe kam kërkuar që të ndihmojnë në ndalimin e përpjekjes së Kurtit për të shkatërruar dialogun sepse Kurti dëshiron të pengojë pagimin e pagave dhe pensioneve për njerëzit tanë në shëndetësi, arsim, që do të nënkuptonte një largim jo të qetë, por me zë të lartë të serbëve nga Kosova dhe Metohija”, u tha Vuçiq gazetarëve në Davos pas takimit me Lajçak.

Siç thotë, ai beson se nuk është në interes as të Evropës dhe as të botës që kjo të ndodhë dhe thekson se nuk ka kërkuar mbështetje për Serbinë, por për njerëzit e thjeshtë.

“Kam kërkuar që banorët e KeM të lejohen të jetojnë në vatrat e tyre në përputhje me marrëveshjet dhe parimet e vitit 2015 që unë dhe Isa Mustafa kemi nënshkruar dhe në përputhje me planin e ri për BKS të paraqitur nga BE - gjermanët dhe francezët. Nëse dikush dëshiron ta rrënojë edhe atë, çfarë u mbetet serbëve. Ky është kërcënimi më serioz dhe më i madh për dialogun dhe kanë paralajmëruar se mund ta nisin këtë aksion nga fillimi i shkurtit”, tha Vuçiq.

Në pyetjen e një gazetari nëse SHBA dhe Ndihmës Sekretari Amerikan i Shtetit për Çështjet Evropiane dhe Euroaziatike, Xhejms O'Brajan dhe përfaqësuesi i BE-së Mirosllav Lajçak janë të vetëdijshëm për kërcënimin ndaj popullit serb nëse Prishtina fillon të zbatojë vendimin për anulimin e transaksioneve të pagesave me Serbia dhe nëse ata kanë një plan për këtë çështje, Vuçiq tha se nuk i takon atij të flasë në emër të të tjerëve, por po ashtu theksoi se do të vazhdojë ta diskutojë këtë çështje me përfaqësuesit e Gjermanisë, Francës dhe Italisë.

“Në fund, të gjithë duhet të kuptojnë se për çfarë bëhet fjalë. Bëhet fjalë për tentativë për anulim të dialogut dhe tentativë për persekutim të popullatës serbe nga Kosova dhe Metohia. Dhe ky është thelbi i gjithë kësaj. Le t'ju thonë si e kuptojnë, nuk mund të flas për ta, por mendoj se janë të vetëdijshëm për pasojat dhe do të ndihmojnë që të mos ndodhin gjëra të tilla, shpresoj”, tha Vuçiq.

Në Davos, presidenti i Serbisë po merr pjesë në Forumin Ekonomik Botëror.

Ai po ashtu ka thënë se në një takim me kryetaren e Këshillit të Ministrave të Bosnjë-Hercegovinës, Borjana Kristo, ka marrë ftesë që Serbia të marrë pjesë në panairin në Mostar dhe shtoi se Borjana Kristo së shpejti do të marrë një ftesë nga kryeministrja serbe Ana Brnabiq për të vizituar Beogradin. Siç shtoi ai, në panairin në Mostar do të prezantohet linja e re ajrore që do të krijojë Air Serbia ndërmjet Beogradit dhe Mostarit.

Vuçiq tha se ka folur me disa njerëz të biznesit, përfaqësues të disa kompanive, por edhe me krerët e shërbimeve të huaja inteligjente.

Gjithashtu, siç tha ai, është takuar edhe me ministrin e Jashtëm të Ukrainës, me të cilin ka pasur një bisedë të gjatë me mirëkuptim dhe për çështje për të cilat ata nuk mendojnë tamam njësoj.

Duke komentuar takimin me O'Brajan, ai tha se ka pasur një bisedë të gjatë dhe kuptimplotë me të.

“O’ Brajan është një njeri jashtëzakonisht inteligjent dhe unë pata një bisedë të gjatë me të që nuk ishte e thjeshtë, zgjati më shumë se dy orë e gjysmë. I thashë gjithçka dhe ai dëgjoi me shumë vëmendje gjithçka që kisha për të thënë. Kam folur shumë hapur dhe sinqerisht”, tha Vuçiq.

Ai ka theksuar se me ndihmës sekretarin amerikan të Shtetit ka biseduar rreth një orë për Kosovën dhe se kanë biseduar për tema të tjera për një orë e gjysmë. Ai tha se temat ekonomike duhet të jenë prioritet i forumit në Davos, por se ato diskutohen në margjinat e atyre politike.

“Ky forum ekonomik është bërë politik”, përfundoi Vuçiq.

Për Serbinë, thotë ai, është e rëndësishme të diskutohet për progresin e saj ekonomik dhe njoftoi se do të prezantojë planet e vendit deri në vitin 2027 para përfaqësuesve ndërkombëtarë në Davos.

Të gjithë ata që duan të marrin pjesë dhe të ndihmojnë janë të mirëseardhur”, tha Vuçiq, duke theksuar se Serbia është e hapur për investime të reja.

Zgjedhjet amerikane dhe evropiane janë temë kudo, Serbinë e presin katër vite paqe dhe stabilitet

Sipas tij, një nga temat që dominon në Davos është marrëdhënia mes Amerikës dhe Kinës.

"Këto dy vende përbëjnë 45 për qind të ekonomisë botërore, të gjithë ne të tjerët jemi të vegjël. Kjo është tema e parë, e dyta është bota arabe apo islame, amerikanët po flasin gjithnjë e më shumë për Izraelin - Gaza, Palestina. Tema e tretë është Ukraina dhe ajo që në një farë mënyre kapërcen gjithçka, askush nuk dëshiron të flasë për të, por tema thelbësore kudo janë zgjedhjet amerikane dhe evropiane”, tha presidenti i Serbisë.

Kur bëhet fjalë për ndryshimet klimatike, ai thekson se të gjithë kanë frikë të zbatojnë masat, sepse, siç thotë ai, disa nga ata njerëz do të humbasin zgjedhjet.

“Tani do të shihni që ne duam të zbatojmë masa dhe prandaj do të shkojmë në një nivel gjithnjë e më të fortë të burimeve të rinovueshme të energjisë, një nivel më të lartë të mbrojtjes së mjedisit, forcimit të ekologjisë...Në vendin tonë zgjedhjet kanë përfunduar dhe na presin katër vite paqe dhe stabilitet, për ta shtyrë vendin tonë përpara”, tha Vuçiq.

​ Ai shtoi se ka biseduar me shumë njerëz në Davos.

“Kam biseduar me amerikanët, do të flas me të gjithë për përmirësimin e pozitës së vendit tonë, të shtunën nëse në pesë apo gjashtë do të prezantojmë gjithçka që duam të bëjmë në periudhën e ardhshme”, tha Vuçiq.

Ai vlerësoi se është mirë që amerikanët nuk patën recesion, por një rritje më të vogël dhe shtoi se pritet që Kina të fillojë të rimëkëmbet.

“Besoj se Serbia mund të ketë një rritje prej mbi 3.5 për qind, pastaj pensionet dhe pagat do të rriten në mënyrë serioze. Nëse jemi mbi 3.5 për qind, po rrisim pa masë pagat, pensionet dhe standardin e jetesës, inflacioni është nën tre për qind, do të ketë më pak probleme, në qershor dhe korrik pres ulje të interesit edhe për kredinë për banesa”, tha ai.

​Sipas fjalëve të tij, shkalla e papunësisë në Serbi nuk duhet të kalojë 10 për qind.

“Ky është një nga kushtet që ne të jemi në gjendje t'i realizojmë të gjitha këto deri në vitin 2027. Për Expo dëshirojmë që të kemi automjete autonome, gjegjësisht automjete pa shoferë, të jenë kampionë në prodhimin e veturave elektrike, siç e dini, prodhimi i “pandës” së vogël ka filluar që nga qershori, korriku në Kragujevc. Ne duam që në çdo vend të Serbisë të kemi stacione për karikimin e automjeteve elektrike, që të jemi të parët në rajon në të gjitha këto çështje”, tha Vuçiq.

Ai shtoi se do të shihet nëse Serbia do të ketë sukses në këtë dhe theksoi se qëllimi është mbrojtja e popullatës serbe në Kosovë dhe ruajtja e paqes.

Duke iu përgjigjur pyetjeve të gazetarëve për seancën e Parlamentit Evropian, ku temë do të jenë zgjedhjet në Serbi, presidenti tha se disa "do të dalin përpara për të thënë më të keqen, disa për të thënë pak më bukur".

“Çfarë të them, të ankohem në Parlamentin Evropian? Sot diskutojnë për Hungarinë, Greqinë dhe sundimin e ligjit në Sllovaki, kështu që në agjendë e kanë vënë edhe Serbinë. I falënderoj për kompaninë që zgjodhën për Serbinë. Nuk kam asnjë problem me këtë”, tha Vuçiq.

Ai theksoi se zgjedhjet ishin të pastra.

“Ata mund të bëjnë një sondazh të opinionit publik sot, veç se do të shihnin që ata ranë pak, jo aq pak, por ranë, dhe ne u ngritëm pak, jo aq pak, por u ngritëm. Çfarë duhet t'u bëj? Populli i do njerëzit që punojnë dhe luftojnë për vendin e tyre, jo ata që ankojnë për veten e tyre dhe që kurrë nuk kanë bërë asgjë për vendin”, tha Vuçiq.