Vuçiq: Presione të reja po vijnë, disa nuk do të zbatojnë BKS

Kryetari i Partisë Progresive Serbe (PPS), Aleksandar Vuçiq, ka vlerësuar sot në seancën e Kryesisë së Partisë se Serbia do të përballet me presione të mëdha në periudhën e ardhshme, sepse disa nuk do ta zbatojnë Bashkësinë e Komunave Serbe.

“Disa nuk do ta zbatojnë BKS. Do të përballemi me presione të mëdha. Dhe në mes të gjithë kësaj, i dhanë liberalizimin e vizave. Në periudhën e ardhshme do të jemi nën presion shtesë. Ata duan ta tërheqin Serbinë në konflikt me NATO. Se unë do të isha një lloj Putini dhe Kurti një lloj Zelenski. Fatkeqësisht, ata padyshim kanë mbështetjen e një pjese të Bashkësisë Ndërkombëtare, sepse është fëmija i tyre”, tha Vuçiq.

Ai përkujtoi se BKS është përcaktuar me Marrëveshjen e Brukselit.

Vuçiq shton se bashkësia ndërkombëtare ka pasur mundësi të bëjë presion ndaj Prishtinës me liberalizimin e vizave.

"Por siç e shihni nuk u shkon në mendje”, ka theksuar Vuçiq.

“Ata nuk duan normalizim, të gjithë bashkë duan ta poshtërojnë Serbinë. Sado që përpiqeni ta realizoni, po ju them se nuk do të ndodhë. Nuk do të ketë asnjë poshtërim, asnjë kapitullim, asnjë dorëzim. Ne po përgatitemi për bisedimet të hënën dhe të martën. Pas kësaj shkoj në Ohër. Më besoni, as nuk e di pse po flasim. A duhet ta njohim Kosovën? E zbuluat lirë”, tha Vuçiq.

Ai bëri të ditur se më 26 apo 27 prill do të shpallë Kuvendin e Partisë për 27 maj, kur do të zgjidhen të gjitha organet e partisë.

“Ne nuk i mbajmë mbledhjet e Bordit Kryesor mjaft shpesh dhe është mirë të mblidhemi dhe të dëgjojmë njëri-tjetrin. Sa i përket asamblesë së partisë, në përputhje me statutin e PPS-së, për të cilin folëm në Kryesi, më 26 ose 27 prill do ta thërras kuvendin për 27 maj të këtij viti. Dhe zgjedhjet e brendshme partiake tashmë janë duke u zhvilluar, diku po zhvillohen në mënyrë të mirë, diku në një mënyrë më pak të mirë”, shpjegoi ai.