Vuçiq: Radoiçiqi akuzohet nga prokurori për krime të rënda që ai vetë i ka pranuar, hetimi do të vazhdojë

Presidenti i Serbisë, Aleksandar Vuçiq, ka deklaruar sot se Prokuroria po e akuzon ish-nënkryetarin e Listës Serbe, Millan Radoiçiq, për krime të rënda që ai vetë i ka pranuar, dhe se hetimi do të vazhdojë, si dhe se do të ngrihet aktakuzë.

Vuçiq, pas akademisë ceremoniale me rastin e 45 vjetorit të Institutit për sëmundje kardiovaskulare “Dedinje”, iu përgjigj pyetjeve të gazetarëve dhe tha se hetimet do të vazhdojnë, aktakuza do të ngrihet dhe se gjithçka do të mbulohet me fakte të vërtetuara.

“Nuk do të doja ta mbroj Radoiçiqin sepse ai është përgjegjës para autoriteteve tona gjyqësore dhe ai ende nuk është ngritur aktakuzë, kur të kryhet hetimi, nëse do të ketë apo jo zgjatje të hetimit, kjo varet nga organet kompetente shtetërore. Ata do t'i vërtetojnë të gjitha këto fakte”, tha Vuçiq në përgjigje të pyetjes së TV N1 se nga i ka marrë Radoiçiq paratë për "shtëpinë madhështore në liqenin e Ujmanit dhe të gjitha armët e konfiskuara", duke shtuar se Radoiçiqi “investoi në vendin e tij në një shtëpi ku dëshiron të jetojë më mirë me familjen e tij”.

Presidenti tha se të gjitha këto fakte do t'i përcaktojë hetimi dhe se nuk ka ndërmend, sepse nuk është as prokuror dhe as gjyqtar, të dënojë askënd para se organet kompetente të vërtetojnë faktet.

Vuçiq ka theksuar mënyrën se si është bërë pyetja, duke thënë se një ditë opozita dhe mediat që mbështesin opozitën e kritikojnë për shkak të tre serbëve të vdekur, të nesërmen thonë se është dashur t'i mbronte më shumë serbët nga Kosova, dhe më pas kërkojnë nga Zhozep Borelit që të vendosen sanksione ndaj tij.

"Ne pamë diçka të paprecedentë, e cila pasqyron natyrën e politikës që ata udhëheqin, e cila është - 'vendosni sanksione ndaj Vuçiqit'. Të njëjtat kërkesa kanë edhe Osmani, Kurti, Gjillasi dhe Alleksiqi. Unë njoh disa që kanë pasuri më të madhe në shumë liqene që janë jo në vendin tonë, shumica e liderëve që ju përkrahni janë dhjetë herë më të pasur se Radoiçiqi”, tha Vuçiq.

Kur bëhet fjalë për paratë për armë, Vuçiq përsërit se po bëhet një hetim.

“Unë nuk jam prokuror, as gjyqtar që të marr aktgjykim, nuk mund të them paraprakisht nëse është fajtor siç thoni ju”, tha ai.

Se çfarë “pakete” sjell “pesëshja” do të shohim më 21 tetor

Vuçiq theksoi se shumë njerëz nga jashtë duan të ulin fuqinë e Serbisë, por se zëra të tillë ka edhe brenda vendit.

“Ju po përballeni me presione të jashtme, me ata që do ta shkatërronin Serbinë në mënyra të ndryshme. Nuk besoj se është kështu me "pesëshja", besoj se duan t'i zgjidhin problemet e zgjidhjes së krizës në Kosovë në një mënyrë tjetër. Shpresoj se do të shohim se çfarë lloj pakete është dhe çfarë sjellin më 21 tetor”, u tha Vuçiq gazetarëve.

Ai shtoi se ata që duan të dobësojnë fuqinë e Serbisë gjejnë ndihmës brenda vendit.

“A e kuptoni se çfarë ndodhi? Dikush i shkroi një letër Zhozep Borelit nga ky vend, jo për të vendosur sanksione ndaj Kurtit, atyre që keqtrajtojnë fëmijët serbë dhe popullin serb në KeM, por ndaj liderit të vendit të tyre, sepse ata nuk mund ta mposhtin atë ndryshe. A e kuptoni, kjo nuk ka ndodhur askund. A e kuptoni se me kë kemi të bëjmë”, pyeti Vuçiq.

Presidenti i Serbisë tha gjithashtu se më 21 tetor do të shkojë në Nju Jork për mbledhjen e Këshillit të Sigurimit të OKB-së, e cila do të mbahet më 23 tetor.