Vuçiq: Referendumi për shkarkimin e kryekomunarëve në veri të Kosovës është një tjetër mashtrim i Kurtit

Presidenti serb Aleksandar Vuçiq tha sot se referendumi për largimin e kryetarëve të komunave në katër komuna në veri të Kosovës është një tjetër mashtrim i kryeministrit të Kosovës, Albin Kurti.

Vuçiq njoftoi se i dërguari special i Bashkimit Evropian për dialogun, Mirosllav Lajçak, do të vijë në Beograd më 15 mars.

“Referendumi për shkarkimin e kryekomunarëve në veri të Kosovës është një tjetër mashtrim i Albin Kurtit. Do të flas për këtë në ditët në vijim. Më 15 mars vjen në Beograd i dërguari i BE-së për dialogun ndërmjet Kosovës dhe Serbisë, Mirosllav Lajçak dhe pas kësaj do të shpjegoj se çfarë planifikon Kurti”, tha Vuçiq në përgjigje të pyetjeve të gazetarëve në Beograd.

Si dokumenti për BKS ashtu edhe drafti i ri i propozimit franko-gjerman parashikojnë që Serbia do të financojë detyrimet e saj në dinarë

Sa i përket problemeve për shkak të ndalimit të dinarit, Vuçiq përsëriti se Serbia do të gjejë një mënyrë për të ndihmuar popullin e saj në Kosovë, por ai gjithashtu theksoi se sipas të gjitha dokumenteve për themelimin e Bashkësisë së Komunave Serbe, përfshirë draftin e ri të propozimit franko-gjerman, parashihet që Serbia të financojë të gjitha obligimet e saj në dinarë.

Në kontekstin e kritikave të opozitës për përsëritjen e zgjedhjeve të Beogradit, Vuçiq ka bërë një paralele me disa nga propozimet e tyre për Kosovën, duke treguar se kundërshtarët e tij politikë nuk janë mjaftueshëm të njohur me atë që po flasin.

“Nëse kryetari i Kuvendit zgjidhet më 11, 12 apo 13 mars, zgjedhjet në Beograd duhet të mbahen deri më 11 apo 12 maj. Pra, 28 Prill ose 5 Maj, dhe 5 Maj është Pashkë. Dëshironi që në Pashkë të kemi zgjedhje? Ata flasin marrëzi, kur thonë që unë sjell 'lex specialis'. Atë nuk e sjell presidenti, por kuvendi. E keni sugjeruar? Ata nuk dinin as si të kërkonin zgjedhje...Si kur thonë - çfarë problemi ka, dërgoni euro në Kosovë...Ne kemi banka, por Prishtina kërkon t'i shfuqizojë. Kjo është gjëja. Kjo është qasja më mjerane e disa prej përfaqësuesve të regjimit të mëparshëm”, tha Vuçiq.

Disa prej tyre, kujton ai, më parë e kanë udhëhequr edhe Ushtrinë Serbe, dhe në atë mënyrë, thotë ai, “që ushtarëve tani u vjen turp se si e kanë udhëhequr”, ndërsa e kanë “shkatërruar me urdhër të jashtëm”.

“Dhe ata ju tregojnë për Kosovën... Nuk është problem, nëse duhet, do t’ia dalim dhe do ta gjejmë një zgjidhje për të ndihmuar njerëzit tanë në Kosovë. Por pse jeni menjëherë në krah të Kurtit, në krah të çdo armiku të Serbisë? Unë nuk jam në gjendje ta kuptoj këtë”, tha presidenti i Serbisë.

Ai shtoi se opozita me të gjitha këto po mashtron edhe më tej opinionin.

“Sipas akteve të BKS-së, Serbia mund të financojë detyrimet e saj në dinarë në çdo kohë, nga shëndetësia, arsimi, aktivitetet ekonomike, pensionet... Edhe drafti i ri i propozimit franko-gjerman e parasheh këtë”, theksoi Vuçiq.

Ky i fundit ai shtoi se vetë opozita nuk beson në vjedhjen e zgjedhjeve, sepse do të shkojë në zgjedhje të reja pa problem, sidomos duke pasur parasysh se votimi në Beograd do të jenë të vetmet zgjedhje lokale që do të pasohen nga Odihri.

“E kanë të qartë se nuk ka pasur vjedhje dhe se duhet të fitojnë besimin e popullit. Kushdo që fiton do ta përgëzoj, por nuk do të lejoj gënjeshtra dhe mashtrime si pjesë e lojërave gjeopolitike në të cilat do ta shkatërronin Serbinë”, tha Vuçiq.

​ I pyetur se sa e rëndësishme është që Serbia të ketë një ushtri të fortë, ai u përgjigj se ushtria serbe duhet të jetë dy herë më e fortë se tani.

"Ka dokumente të reja doktrinore që thonë se ne duhet të jemi shumë më të fortë se sot dhe duhet të punojmë shpejt për këtë. Forca jonë duhet të jetë dy herë më e madhe se sot”, theksoi Vuçiq.