Vuçiq: Serbia dëshiron dialog dhe kompromis, por ka parimet dhe pritshmëritë e veta

Presidenti serb Aleksandar Vuçiq theksoi se Serbia planifikon të tregojë se dëshiron dialog dhe kompromis, por se ka parimet dhe pritshmëritë e veta.

Duke përmbledhur javën e kaluar të punës, Vuçiq tha në llogarin e tij në Instagram “buducnostsrbijeav” se paqja dhe jeta normale janë të nevojshme për të gjithë qytetarët.

“Ne kemi nevojë për paqe, një jetë normale për të gjithë qytetarët, rritje dhe zhvillim të mëtejshëm të vendit dhe një të ardhme më të mirë për fëmijët tanë. Plani është që të punojmë edhe më shumë përballë sfidave, të përpiqemi të jemi më të mirët, të tregojmë se Serbia dëshiron dialog dhe kompromis, por edhe se ka parimet dhe pritshmëritë e veta”, tha Vuçiq.

Ai vuri në dukje se per këtë do të nevojiten shumë energji dhe unitet.

“Prandaj do të vazhdoj të flas me të gjithë për gjithçka dhe të luftoj edhe më shumë për Serbinë. Do të na duhet shumë energji dhe shumë më tepër unitet, por do ta shpëtojmë vendin dhe njerëzit dhe ne do të shtyjmë përpara, sepse kjo është e vetmja rrugë! Rroftë Serbia”, ka thënë Vuçiq.