Zyra për KeM: Bashkësia ndërkombëtare të pengojë Kurtin të shkaktojë kriza të reja dhe të ndezë rajonin

Zyra për Kosovë dhe Metohi ka njoftuar se Policia e Kosovës me urdhër të kryeministrit Albin Kurti vazhdon arrestimin dhe keqtrajtimin e serbëve me qëllim të ngritjes së tensioneve dhe shkaktimit të krizës së re në veri, dhe u bëri thirrje përfaqësuesve të bashkësisë ndërkombëtare që të reagojnë, t'i mundësojnë popullit serb në Kosovë të ketë një jetë normale dhe t'i parandalojnë autoritetet në Prishtinë që të ndezin edhe më shumë të gjithë hapësirën e Kosovës, por edhe të rajonit.

“E ashtuquajtura policia e Kosovës e Kurtit, qëllimi dhe detyra e vetme e së cilës është terrorizimi i popullit serb në veri të Kosovës dhe Metohisë, vazhdoi sot me ngacmimet dhe arrestimet e serbëve në komunat veriore dhe me torturat, qëllimi i vetëm i të cilave është të çojë në një rritje të re të tensioneve dhe krizave në terren. Së pari, në një fshat afër Leposaviqit, serb M.M. u ndalua para gruas dhe në sy të pesë fëmijëve të tij dhe më pas banesa e tij është kontrolluar tërësisht në prani të forcave speciale të Kosovës. Sipas të njëjtit skenar dhe diktim, forcat speciale të Kurtit filluan bastisjen e disa objekteve private në veri të Kosovës dhe Metohisë, si në Mitrovicën e Kosovës afër spitalit ashtu edhe në Zveçan”, thuhet në njoftimin e Zyrës për Kosovë dhe Metohi.

Zyra për Kosovë dhe Metohi pyeti përfaqësuesit e bashkësisë ndërkombëtare nëse serbët në Kosovë kanë të drejtë për një jetë normale të përditshme, pa terror dhe frikësim nga Policia e Kosovës.

“Kjo është arsyeja pse ne po kërkojmë nga komuniteti ndërkombëtar që të na përgjigjet - a munden serbët në veri të Republikës së Kosovës të shkojnë në mënyrë paqësore për të marrë bukë, në spital, për t'i çuar fëmijët e tyre në çerdhe apo shkollë, dhe se rruga e tyre nuk është e bllokuar nga mjetet e blinduara të forcave speciale të Kurtit të cilët çdo ditë kryejnë terror brutal dhe e eskalojnë edhe më tej situatën në terren”, thuhet nga Zyra për KeM.

Dëshira e kryeministrit të Kosovës, theksojnë ata, është që të “nënshtrojë” popullin serb në veri të Kosovës dhe “të shfrytëzojë ngjarjet tragjike në Banjskë për persekutim, hakmarrje, torturë dhe ndalim arbitrar të serbëve, me qëllimin e vetëm për spastrimin etnik të veriut të Kosovës në sy të plotë të gjithë bashkësisë ndërkombëtare”.

“Ngjarjet tragjike në Banjskë nuk mund dhe nuk duhet të jenë justifikim për t'i revokuar të gjitha të drejtat njerëzore popullit serb në veri të Kosovës, për t'u bërë peng i regjimit kriminal të Kuritit, i cili ka në shënjestër këdo që ka emër dhe mbiemër serb, dhe që gjatë gjithë asaj kohe Perëndimi dhe misionet ndërkombëtare që veprojnë në këto hapësira të kthejnë kokën nga vuajtjet dhe persekutimet e serbëve”, kanë bërë të ditur nga Zyra për Kosovë dhe Metohi.

Ata i dërguan një kërkesë misionit ndërkombëtar që të ndalojë arrestimet e përditshme të serbëve.

“Kërkojmë që misionet ndërkombëtare të ndalojnë torturat e përditshme të Kurtit, të ndalojnë ndalimin dhe arrestimin e përditshëm të serbëve dhe të japin kontributin e tyre në qetësimin e tensioneve dhe të parandalojë që autoritetet në Prishtinë të ndezin edhe më shumë të gjithë hapësirën e Kosovës dhe Metohisë, por edhe më gjerë, rajonin e Ballkanit Perëndimor”, thuhet në njoftim.