Zyra për KeM: Në Zubin Potok dhe Zveçan janë arrestuar shtatë serbë, hakmarrje e Kurtit

Zyra për Kosovë dhe Metohi njoftoi se sot në mëngjes në Zubin Potok dhe Zveçan janë arrestuar shtatë serbë, duke vlerësuar se bëhet fjalë për hakmarrje të Albin Kurtit ndaj serbëve në veri të Kosovës për shkak të fitores së popullit serb në zgjedhjet lokale, si dhe për shkak të nervozizmit të Prishtinës pas dështimit zgjedhor.

„Në vazhdim të represionit brutal fizik dhe juridik ndaj popullit serb, Albin Kurti urdhëroi sot në mëngjes aksionin e arrestimit të serbëve në Zubin Potok dhe Zveçan, gjatë të cilit u arrestuan shtatë bashkëkombësit tanë. Falangat e tij policore hynë rreth orës gjashtë të mëngjesit në këto dy komuna të qeta serbe në veri të Kosovës dhe Metohisë, së bashku me njësi speciale të armatosura plotësisht, me qëllim që të frikësojnë dhe të sjellin pasiguri mes familjeve dhe shtëpive serbe që prej dekadash jetojnë në këto hapësira,“ thuhet në njoftimin e Zyrës për KeM.

Shtohet se gjendja e rrethimit policor dhe shqetësimi i serbëve zgjati për disa orë.

„Gjatë kësaj aksioni brutale, forcat speciale të Kurtit thyen dyert e shtëpive serbe, duke kryer kontrolle dhe bastisje, me arrestime arbitrare të bashkëkombësve tanë,“ thekson Zyra për KeM.

Të arrestuarve do t’u ofrohet ndihmë juridike, ndërsa për arrestimin e tyre Zyra për KeM do t’i informojë edhe përfaqësuesit ndërkombëtarë.

„Bëhet fjalë për hakmarrje të Albin Kurtit ndaj popullit serb në veri të Kosovës dhe Metohisë, për shkak të fitores së popullit serb në zgjedhjet e përfunduara së fundi, si dhe për shkak të nervozizmit të Prishtinës pas dështimit zgjedhor, të cilin Kurti dëshiron ta kompensojë mbi kurrizin e popullit serb,“ përfundon njoftimi i Zyrës për KeM.

Prokuroria Speciale e Kosovës njoftoi sot në mëngjes se ka urdhëruar kontrolle në nëntë lokacione në komunat Zubin Potok dhe Zveçan, në kuadër të, siç u tha, hetimeve për krim të organizuar dhe vepra të rënda penale.