Mitroviq: Kërkesa për mbrojtjen e ligjshmërisë është dorëzuar në Gjykatën Supreme në rastin e Dalibor Spasiqit

Avokati Srgjan Mitroviq, mbrojtësi i Dalibor Spasiqit, i cili u dënua me 30 ditë paraburgim më 19 qershor për sulm të dyshuar ndaj gazetarëve, si dhe për huliganizëm, ka deklaruar për Kosovo online se sot ka dorëzuar kërkesë në Gjykatën Supreme të Kosovës për mbrojtjen e ligjshmërisë, pasi siç ka thënë ai, Gjykata e Apelit të Kosovës në të cilën është ankuar në këtë rast nuk ka reaguar as pas 14 ditësh.

“Gjykata e Apelit e ka pasur obligim me ligj që brenda katër ditësh t'i përgjigjet ankesës sime për paraburgim, por ja ku është dita e 14-të dhe nuk kemi marrë asnjë përgjigje. Sot kam dorëzuar kërkesë për mbrojtjen e ligjshmërisë në Gjykatën Supreme të Kosovës dhe jam detyruar ta bëj këtë për shkak të mungesës së përgjigjes në ankesë. E kam dorëzuar kërkesën në bazë të Konventës Evropiane për të Drejtat e Njeriut, Kushtetutës së Kosovës dhe shkeljes së procedurës”, ka thënë Mitroviq për Kosovo online.

Ai ka thënë se paraburgimi njëmujor i Spasiqit duhet t'i skadojë më 17 korrik dhe ka shtuar se “ai po mbahet në burg me vendim të pavlefshëm të gjykatës së shkallës së parë”.

“Së paku pres që Gjykata Supreme e Kosovës të marrë vendim se është shkelur e drejta për gjykim në afat të arsyeshëm. Gjykata e Lartë duhet të veprojë urgjentisht dhe të detyrojë Gjykatën e Apelit të zgjidhë këtë situatë. Më ka kontaktuar edhe një zyrtare i EULEX-it, kështu që edhe ata janë të njohur me këtë rast dhe janë të interesuar për të dhe e kam informuar për hapat që kam ndërmarrë”, thotë Mitroviq.

Ai shton se duke i shkelur të drejtat procedurale të Spasiqit, siç janë e drejta për ankesë, e drejta për barazi në procedurë, e drejta për gjykim brenda një afati të arsyeshëm, po shkelet e drejta themelore e njeriut - e drejta për liri.

“Për të gjitha këto kam paraqitur kërkesë në Gjykatën Supreme dhe kam kërkuar që ajo të veprojë në lidhje me kërkesën për mbrojtjen e ligjshmërisë, dhe pres që Gjykata Supreme të bëjë një njoftim urgjent për këtë çështje”, tha Mitroviq.

Dalibor Spasiq, teknik mjekësor nga Mitrovica e Veriut, u arrestua më 17 qershor në Jarinjë teksa po kthehej nga Serbia qendrore me shoqen dhe vajzën e tij të mitur.

Më 19 qershor, Gjykata Themelore në Mitrovicë i ka caktuar masën e paraburgimit prej 30 ditësh.