Numër i madh besimtarësh në liturgjinë e Pashkëve në Kishën e Shën Nikollës në Shtërpcë

Në Kishën e Shën Nikollës në Shtërpcë, në praninë e një numri të madh besimtarësh, u mbajt liturgjia e Pashkëve. Banorët thonë se festën më të gëzueshme të krishterë e kremtojnë tradicionalisht në rrethin familjar.

Në shtëpinë e Emilija Redxhiq Mirkoviq gjithçka është gati për festimin e Pashkëve, pasi përgatitjet kanë filluar disa ditë më herët.

“Pashkët janë festa më e gëzueshme dhe më e madhe e krishterë, e festojmë tradicionalisht në rrethin familjar. Fillojmë përgatitjet një ose dy ditë para Pashkëve me ngjyrosjen e vezëve, dhe këtë e bëjnë të gjithë anëtarët e familjes sime. Ditën e parë të Pashkëve vijmë në liturgjinë e shenjtë, pas kësaj kthehemi në shtëpitë tona dhe në rrethin e familjes së ngushtë, por edhe të gjerë, të afërmve dhe miqve, i festojmë të tre ditët e Pashkëve me gëzim dhe falënderim ndaj Zotit për gjithçka”, tha Rexhiq Mirkoviq.

Boban Staletoviq tha se i vjen mirë që sheh një numër të madh besimtarësh në kishë.

“Njerëzit kanë ardhur të kungohen, të bashkohen me Zotin. Është shumë bukur të shohësh një pamje të tillë, që gjithnjë e më shumë njerëz i drejtohen Zotit dhe kishës. U qoftë për shëndet dhe shpëtim të gjithëve, kjo është një shenjë e mirë për popullin tonë. Sot është zakon të hahet veza e Pashkëve, dhe pastaj fillojmë me ushqime më të yndyrshme pasi kemi agjëruar gjatë gjithë këtyre ditëve”, tha Staletoviq.

Edhe Filip Velkoviq do ta kalojë festën tradicionalisht në rrethin familjar.

“Tradicionalisht kam ardhur të kungohem dhe këtë festë do ta kaloj në rrethin familjar”, tha Velkoviq.

Prifti Boshko Kllisariq kujton se besimtarët gëzohen për ringjalljen e Krishtit sepse Zoti e mundi vdekjen.

“Pashkët janë festa jonë më e gëzueshme e krishterë. Të gjithë të krishterët ortodoksë festojnë për tre ditë. Vuajtja e Zotit tonë nga e Enjtja e Madhe dhe pastaj ajo heshtje kur Ai u hoq nga kryqi. Në kishën tonë këmbanat nuk bien në ato ditë, përdoren klepala dhe kjo është hyrje për në Pashkë. Dhe vetëm atëherë zjarri i bekuar zbret nga qielli, ai mrekulli e Zotit. Kjo është dëshmi e pranisë së Shpirtit të Shenjtë dhe konfirmim i ringjalljes. Le të gëzohen të krishterët për ringjalljen e Krishtit sepse Zoti e mundi vdekjen. Të gjithë besimtarëve ortodoksë ua uroj Pashkët me përshëndetjen ‘Paqja e Zotit, Krishti u ngjall – Vërtet u ngjall’”, tha Kllisariq.