Serbët në Kosovë e pritën Vitin e Ri pa festime të mëdha, me familjen dhe miqtë

Qytetarët në komunat me shumicë serbe në Kosovë e kanë pritur Vitin e Ri me familjen dhe miqtë, pasi për shkak të situatës aktuale të sigurisë, nuk ka pasur festë të organizuar në objektet e hotelerisë. Pikërisht në mesnatë, me mjete të forta piroteknike, ata përshëndetën vitin e vjetër dhe shpallën hyrjen në vitin e ri.

Në Mitrovicë Veriore, Zveçan, Leposaviq dhe Zubin Potok nuk ka pasur pritje në lokale dhe kafene, por festimet janë mbajtur në ambientin e shtëpisë.

Mitrovica Veriore është zbukuruar me dekorime për Vitin e Ri dhe vetëm një ditë para Vitit të Ri është vendosur pema e Krishtlindjes në shëtitoren që të shpie nga sheshi Princ Llazar pothuajse te ura mbi Ibër.

Karabinierët italianë janë në detyrë në urën kryesore mbi Ibër, ndërsa në lagjet multietnike të qytetit ende ka njësi të forta speciale të policisë së Kosovës nga radhët e shqiptarëve, të armatosur me arma të gjata.

Tradicionalisht, mitrovicasit Vitin e Ri Ortodoks e festojnë jashtë shtëpisë, me program dhe shërbime të pasura kulturo-artistike, por është e diskutueshme nëse do të organizohet edhe këtë vit.

Tensionet në veri të Kosovës janë zbutur pak, por frika dhe pasiguria ende janë të pranishme, sepse i gjithë veriu i Kosovës është në një lloj unaze të pjesëtarëve të njësive speciale nën komandën e Prishtinës.