Shahini: Në Kosovë fuqia punëtore është më e lira në rajon, por edhe kostoja e jetesës është minimale

Kosova ende ka fuqinë punëtore më të lirë në rajon, por edhe kostoja e jetesës është minimale, thotë kryetari i Aleancës së Biznesit të Kosovës, Agim Shahini. Ai shton për Kosovo online se kjo tërheq punëtorët e huaj të cilët të paktën kur bëhet fjalë për ekspertët, shpeshherë kanë kushte më të mira se punëtorët vendorë.

“Kosova ka ende fuqinë punëtore më të lirë dhe vazhdimisht kërkohet punëtorë të rinj, por pagat kanë filluar të rriten edhe në sektorin privat, gjë që është mirë sepse i pengon punëtorët të largohen nga Kosova”, thotë Shahini.

Në anën tjetër, thotë ai, Kosova është edhe vendi më i lirë për të jetuar në Ballkan.

“Në Kosovë njeriu mund të jetojë më mirë me një rrogë të mirë se dikush në disa vende të tjera të Ballkanit, sepse gjithçka nuk është bërë më e shtrenjtë. Ende në Kosovë mund të hash dy euro sa të duash, e prapë në Kosovë ju mund të pini kafe për më pak se 50 cent dhe kjo është diçka që nuk gjendet në vendet e tjera”, shpjegon ai.

Ai e vlerëson si problem standardin e dobët të jetesës dhe thekson se, sipas statistikave të UNDP-së, në Kosovë ende ka rritje të varfërisë.

“Qytetarët ende duan të largohen nga Kosova, sepse nuk kanë rrogë të mirë, nuk kanë punë të mirë sepse qeveria e Kosovës nuk ka strategji për të luftuar varfërinë”, shton ai.

Shahini thotë se në Kosovë vijnë punëtorë të huaj nga të gjitha anët – nga Shqipëria, Maqedonia, Turqia, Bullgaria, madje edhe nga Bashkimi Evropian.

“Tashmë kanë filluar të vijnë më së shumti punëtorët nga India dhe Bangladeshi. Ata e përdorin Kosovën si tranzit dhe sipas të dhënave tona vitin e kaluar kanë ardhur këtu për të punuar më shumë se 5.000 punëtorë, punëtorë të huaj”, thotë ai.

Punët që punojnë janë të ndryshme, shpjegon ai, nga ndërtimi, shërbimi, gastronomia, veçanërisht puna në kuzhinë dhe përgjithësisht kanë të njëjtat kushte si punëtoret vendasë, përveç një kategorie.

“Kur bëhet fjalë për ekspertët që vijnë nga jashtë, kërkojnë kushte më të mira, paga më të mira, banesa..., pra kanë kushte më të mira se punëtorët tanë”, thotë Shahini.

Ai shton se të huajt kryesisht vijnë vetëm, pa familje.

“Nëse i shikojmë punëtorët që vijnë nga India, Bangladeshi, Filipinet..., më shumë se 50 për qind e tyre synojnë të shkojnë në Evropë, vijnë sepse Kosova ka marrë liberalizimin e vizave dhe me synimin që pas disa vitesh, kur marrin pasaportën e Kosovës ikin diku”, thotë Shahini.