Blinken iu shmang Kurtit dhe Osmanit në përvjetorin e pavarësisë, takimi vetëm me Vuçiqin një mesazh për Prishtinën

Mesazhi i Gabriel Eskobarit se “BKS do të formohet me ose pa Kurtin” mesa duket nuk është marrë mjaft seriozisht në Prishtinë, kështu që pasoi një e re - në përvjetorin e pavarësisë së vetëshpallur të Kosovës, Sekretari Amerikan i Shtetit Entoni Blinken u takua me presidentin serb Aleksandar Vuçiq në Mynih, dhe takimi me Albin Kurtin dhe Vjosa Osmanin ka munguar.

“Amerika ka marrë një rol aktiv në dialog, investoi ndikimin dhe besueshmërinë e saj politike dhe sigurisht nuk do ta lejojë Kurtin ta shantazhojë, ndaj nuk është për t'u habitur që Sekretari i Shtetit Entoni Blinken nuk u takua me Vjosa Osmanin dhe Albin Kurtin në Mynih”, thotë diplomati në pension Zoran Millivojeviq për Kosovo Online.

Sipas Millivojeviqit, ky është një vazhdimësi e politikës pragmatike të SHBA-së dhe njohjes së situatës në terren.

“Takimi në Mynih, duke mos përmendur njohjen reciproke dhe mesazhet që pasuan takimin me Vuçiqin, si dhe mbështetjen për rrugën evropiane të Serbisë, tregojnë qëndrimin konstruktiv të SHBA-ve. Sigurisht, kjo nuk do të thotë ndryshim qëndrimi nga ana e Uashingtonit, por do të thotë një vlerësim i faktit që Serbia është kyçe në rajon dhe ndryshe nga disa vende evropiane, në radhë të parë Britania e Madhe dhe Gjermania, SHBA-të sillen në mënyrë pragmatike”, thotë Millivojeviq.

Në pyetjen se si do të interpretohet në Prishtinë se Blinken u takua me Vuçiqin në përvjetorin e pavarësisë së vetëshpallur të Kosovës dhe çfarë mesazhi është dërguar thotë Millivojeviq:

“Edhe më parë ata morën një mesazh serioz kur Eskobari tha qartë se BKS do të formohet me ose pa Kurtin. Është e qartë se ata kanë kërkuar një alternativë për të, sepse në gjashtë muajt e fundit përfaqësuesit e të gjitha partive të mëdha opozitare parakaluan nëpër Uashington. Është e qartë se ata po kërkojnë një alternativë për Kurtin.

Makroni në takimin me Vuçiqin, për Kurtin shefin e diplomacisë

Presidenti francez Emanuel Makron është parë në një takim me presidentin serb Aleksandar Vuçiq së bashku me kancelarin gjerman Olaf Sholc, por në një takim trepalësh me kryeministrin e Kosovës Albin Kurti, përfaqësuesja e Francës ishte diplomatja franceze Katarina Colona, shkruan Demokracia.
Kryetari i Kongresit të Miqësisë Serbo-Amerikane, Vlladimir Marinkoviq, tha për Kosovo Online se kjo nuk është hera e parë që “Blinken nuk ka dashur të takohet me Kurtin dhe se është sekret i hapur se Makroni nuk është në favor të qëndrimit agresiv të shqiptarëve të Kosovës në lidhje me stabilitetin rajonal”.

“Kjo përfaqëson vazhdimësinë e politikës amerikane. Kur Kurti ishte në SHBA në maj të vitit të kaluar, as Blinken nuk donte ta pranonte dhe atij iu ofrua një takim me Eskobarin, të cilin ai e refuzoi. Ky është mesazhi i administratës zyrtare amerikane dhe çfarë qëndrimi kanë ndaj Albin Kurtit, kështu që ne presim një pranverë dhe verë shumë të nxehtë sa i përket politikës së brendshme në Prishtinë. Mendoni se përballja me Abazin ishte një rastësi? Kur bëhet fjalë për Makronin, mendoj se flet shumë vetë fakti që ai e ka anashkaluar takimin me Kurtin”, thotë Marinkoviq.

Juristi Millan Antonijeviq për Kosovo Online thekson se “diplomacia është aftësia e dërgimit të mesazheve që nuk janë domosdoshmërisht me fjalë, por edhe në veprime, d.m.th në takime që organizohen ose nuk organizohen”.

“SHBA po insistojnë në formimin e Bashkësisë së Komunave Serbe dhe ky është mesazhi që ata ua kanë përcjellë zyrtarëve kosovarë në disa raste, si dhe në takimin e vitit të kaluar, në shtator kur sekretari Blinken u takua në Uashington me Vjosa Osmanin dhe Albin Kurtin. Është mirë për Serbinë që takimi në një nivel kaq të lartë në Konferencën e Sigurisë në Mynih u zhvillua dhe mesazhi i Blinkenit, pas takimit me presidentin Vuçiqin, ishte mbështetje e hapur për dialogun ndërmjet Beogradit dhe Prishtinës dhe qëndrimin konstruktiv të Serbisë në ato negociata të vështira. Nuk duhet të anashkalojmë mbështetjen që Blinken i dha në takim rrugën e Serbisë drejt Bashkimit Evropian dhe qëndrimin e Serbisë ndaj luftës në Ukrainë. Kjo flet për marrëdhëniet mes Serbisë dhe SHBA-së, të cilat janë në rritje”.