Escobar: SHBA-ja mbështet “Ballkanin e Hapur”

I dërguari i Posaçëm i SHBA-së për Ballkanin Perëndimor, Gabriel Escobar, tha se Amerika mbështet “Ballkanin e Hapur” dhe se e sheh këtë iniciativë si një përpjekje për t'u integruar në BE, raportojnë Reporters.

Escobar theksoi se marrëdhëniet tregtare janë në rrugën e duhur dhe se ka ende shumë për të bërë për të përmirësuar klimën e investimeve.

“Ne mbështesim nismën e Ballkanit të Hapur, mbështesim përpjekjet tuaja për t'u integruar më pranë fqinjëve tuaj dhe Bashkimit Evropian. Vëmë re shumë gjëra pozitive. Tani, ka ende gjëra që mund të bëni për të ndihmuar në përmirësimin e klimës së investimeve, veçanërisht në lidhje me gjykatat tregtare dhe pavarësinë e gjyqësorit. Por tani për tani, marrëdhëniet tregtare janë me të vërtetë në rrugën e duhur dhe ne shohim që gjëra të rëndësishme po ndodhin”, tha Escobar në një paraqitje në televizionin shqiptar Top Channel.