Jevtiq: BKS është një çështje thelbësore dhe jetike për ne

Nënkryetari i Listës Serbe dhe Kryetari i Komunës së Shtërpcës, Dallibor Jevtiq, vlerësoi se është e rëndësishme të vazhdohen diskutimet dhe dialogut, duke shtuar se kjo është mënyra e vetme për të ruajtur paqen në Kosovë, por se formimi i BKS-së është parakusht për zbatimin e mëtutjeshëm të çdo plani, shkruan Jedinstvo.

Vazhdimi i dialogut ndërmjet Beogradit dhe Prishtinës në Ohër, nën patronatin e Bashkimit Evropian, është planifikuar për 18 mars. Plani franko-gjerman për Kosovën do të jetë në tavolinë dhe i dërguari i BE-së Miroslav Lajçak, para takimit të dakorduar, me nxitim po zhvillon takime me përfaqësuesit politikë të serbëve dhe shqiptarëve, duke tentuar të afrojë palët e largëta.

Në një intervistë për Jedinstvo, Jevtiq theksoi se përfaqësuesit e serbëve nga Kosova në takimin me Lajçakun e kanë bërë të qartë se qëndrimi i tyre nuk ka ndryshuar dhe se pa formimin e BKS-së, serbët nuk do të kthehen në institucione dhe nuk do të marrin pjesë në zgjedhjet në veri.

Aktualisht, në jetën politike të Beogradit dhe Prishtinës, ekziston një plan franko-gjerman, gjegjësisht plan evropian për normalizimin e marrëdhënieve ndërmjet Beogradit dhe Prishtinës. Si e vlerësoni planin e përmendur?

Vetë plani është politikisht mjaft sfidues dhe i vështirë. Është sigurisht e rëndësishme që të bisedohet dhe të vazhdojë dialogu si e vetmja mënyrë për të ruajtur paqen. Parakusht për zbatimin e mëtejshëm është sigurisht formimi i BKS-së. Duke besuar në urtësinë dhe politikën e Aleksandar Vuçiqit, jemi të sigurt se rezultati përfundimtar do të jetë në interes të popullit serb dhe shtetit të Serbisë. Komuniteti i komunave serbe është një çështje thelbësore dhe jetike për ne. Nga ana tjetër, qarkullimi i lirë i njerëzve dhe kapitalit është diçka që, jam i sigurt, do të zvogëlojë tensionet mes qytetarëve të thjeshtë, tensione që Prishtina i krijoi me lëvizjet e saj të njëanshëm.

Përfaqësuesit e Listës Serbe, përfshirë edhe ju, u takuan të premten me të Dërguarin i Posaçëm të BE-së për dialogun ndërmjet Beogradit dhe Prishtinës, Miroslav Lajçak. Çfarë i keni paraqitur atij me atë rast?

Duke përdorur shembuj konkretë, ne theksuam pozitën e vështirë të serbëve, praninë e mosbesimit total në pushtetin aktual në Prishtinë. Ne morëm gjithashtu konfirmimin se gjithçka që kemi paraqitur është konfirmuar nga përfaqësuesit e BE-së në terren. Prandaj, problemet e popullit serb nuk janë çështje politike, por çështje mbijetese. Dhuna institucionale e kryer nga Qeveria e Kosovës, retorika që i shënon serbët si kriminelë, çoi në largimin e serbëve nga institucionet në veri të Kosovës, ndërprerje edhe të komunikimit më të vogël të serbëve në të gjitha nivelet dhe incidente si ai i 6 janarit në Shtërpcë. Përveç atyre temave, ne folëm më së shumti për formimin e BKS-së dhe dëgjuam pa mëdyshje nga zotri Lajçak se pa zbatimin e marrëveshjeve të mëparshme, pra pa formimin e BKS-së, nuk mund të fillojë zbatimi i planit të ri evropian. Në këtë kontekst, biseduam edhe për zgjedhjet lokale në veri të Kosovës dhe për kthimin e serbëve në institucione, ku u tha qartë se qëndrimi ynë për këtë çështje nuk ka ndryshuar dhe se pa fillimin e formimit të BKS-së nuk do të ketë pjesëmarrje në zgjedhjet lokale apo kthim të serbëve në institucione.

Si e shihni situatën e sigurisë dhe politik pasi të gjitha incidentet dhe sulmet ndaj serbëve janë kryesisht rezultat i retorikës që vjen nga Prishtina nga kryeministri Albin Kurti?

Situata politike dhe e sigurisë në Kosovë është shumë e brishtë, e tensionuar. Kur shikon në nivelin ditor, pothuajse gjithmonë kemi një incident, është e qartë se si është situata. Epo shikoni si flet Kurti dhe të tjerët për serbët, si arrestohen serbët, si u shkelen të drejtat themelore të njeriut, ata dënohen paraprakisht pa prova, është e qartë se rezultati i politikës së tanishme të qeverisë në Prishtinë është katastrofike në të gjitha nivelet. Ne e kemi të qartë se cili është qëllimi i qeverisë aktuale në Prishtinë, e cila ka sjellë në një situatë ku nuk ka siguri për serbët dhe qëllimi është që serbët të largohen nga hapësira e Kosovës. Hetimet, sulmet, aktakuzat, të gjitha këto nuk janë të rastësishme. Këtu shtrohet pyetja se çfarë do të bëjë bashkësia ndërkombëtare për këtë çështje dhe nëse do të qëndrojnë vëzhgues të heshtur të asaj që po bën Kurti apo më në fund do t'i pengojnë veprimet e tij sepse kjo nuk është vetëm kërcënim për sigurinë në Kosovë, por edhe në rajon.

Komuna që ju drejtoni po përballet me probleme dhe sulme të shumta nga autoritetet qendrore në Prishtinë. Një prej atyre sulmeve ishte para disa ditësh kur Prokuroria e Kosovës ngriti padi kundër disa banorëve që ishin në protesta për shkak të ndërtimeve pa leje nga ana e shqiptarëve. Në fakt, në vend të dënimit të uzurpatorit, autoritetet gjyqësore të Kosovës duan të ndëshkojnë serbët që mbrojnë të drejtën dhe ligjin?

Me përjashtim e veriut të Kosovës, Komuna e Shtërpcës ka qenë shënjestër politike e pushtetit aktual që nga momenti kur Albin Kurti erdhi në pushtet. Ndërhyrjet e forcave speciale të policisë, arrestimet, ndalimet, dërgimi i policisë në vetë institucionin e komunës, injorimi i çështjeve procedurale dhe teknike nga Qeveria e Kosovës përmes procedurave administrative të Komunës së Shtërpcës, duke injoruar kërkesat dhe shkresat tona ligjore dhe legjitime, etiketimi i qytetarëve të Shtërpcës në mënyra të ndryshme, shtimi i pranisë dhe punës së shërbimit të inteligjencës të Kosovës dhe rekrutimi i disa bashkëqytetarëve tanë me precedentë penalë për të punuar kundër Komunës së Shtërpcës dhe qytetarët e saj, janë vetëm disa nga problemet dhe sfidat e shumta me të cilat përballemi sot. Shembulli i tentativës për ndërtim pa leje në fshatin Sevcë, protesta e banorëve vendas dhe reagimi institucional i komunës që drejtoj, dhe si rezultat i luftës sonë ligjore dhe demokratike ngritja e aktakuzës ndaj bashkëqytetarëve tanë që protestuan, është një pasqyrë e qartë e rrethanave në të cilat jetojmë dhe punojmë dhe padrejtësisë me të cilën luftojmë. E dini, kolegët dhe miqtë tanë janë në paraburgim për më shumë se 15 muaj për shkak të gjoja luftës kundër korrupsionit dhe ndërtimeve pa leje në Brezovicë. Kur ne luftojmë kundër ndërtimeve pa leje, sërish na kërcënojnë me padi dhe paraburgim. Në vend që të ndiqet personi që shkel ligjin, paditë mbërrijnë në adresë të njerëzve të thjeshtë që mbrojnë vetëm ekzistencën dhe të drejtën e tyre për jetën. Dhe ky proces është vetëm një në serinë e shtypjes sonë, por pavarësisht nga çdo gjë, ne nuk heqim dorë nga lufta jonë demokratike dhe në atë luftë e vërteta është arma jonë më e fortë dhe e vetme.

Autoritetet gjyqësore të Prishtinës e cilësuan plagosjen dhe tentativë vrasjeje e një djali dhe një të riu serb në Ditën e Buzmit nga pjesëtarë të FSK-së si “shkaktim i rrezikut të përgjithshëm”, akt që i nënshtrohet një dënimi simbolik. A nuk është ky një mesazh i hapur dhe presion ndaj popullit serb që të largohet nga shtëpitë e tyre?

Këto ditë, krahas të gjitha presioneve, sidomos nga momenti kur kritikova publikisht rikualifikimin e krimit ndaj personit që qëlloi dhe plagosi Stefanin dhe Milloshin me atë rast, jam ekspozuar ndaj sulmeve dhe ofendimeve e kërcënimeve të ndryshme nga disa shqiptarët vetëm se thashë të vërtetën, që bëhet fjalë për tentativë vrasjeje, jo për “shkaktim të rrezikut të përgjithshëm”. Avokati i të dyshuarit po më kërcënon me padi, të tjerët më thonë se duhet “të edukojmë fëmijët se si të sillen kur shkojnë të mbledhin buzmit”, të tjerët më quajnë kriminel dhe terrorist dhe shërbëtor të Aleksandër Vuçiqit, ndërsa ka edhe ata që më thonë që nuk i përkas Kosovës e Metohisë. Përgjigja ime për të gjithë ata është e qartë: ju nuk më keni frikësuar apo lëkundur. Jam krenar për faktin që kam mundësinë të punoj dhe të ndjek politikën e Aleksandër Vuçiqit, sepse është politikë paqeje, është politikë bashkëjetese, është në kundërshtim me atë që na thonë ata që justifikojnë pushkatimin e Stefanit dhe Milloshit. Për fat, Stefani mbijetoi. Centimetra vendosi. Dhe pastaj dikush më thotë se nuk është asgjë? Dikush pret që unë të hesht për këtë? Në fund do të rezultojë se Stefan dhe Millosh qëlluan veten. Na thonë të heshtim se nëse nuk heshtim do të na ndjekin penalisht apo nuk di çfarë të bëjmë? Epo, unë u them qartë që nuk do të heshtim, as kolegët, as unë, as qytetarët. Me protestën e 8 janarit e treguam qartë se çfarë mendojmë të gjithë për atë dhe për të gjitha sulmet e tjera ndaj fëmijëve serbë, ndaj serbëve si popull. Dhe do të kisha shumë për të thënë për këto të fundit si dhe për të gjitha sfidat dhe sulmet e tjera me të cilat po përballet populli serb dhe ne si përfaqësues legjitim të popullit serb. Nga ana tjetër, mbështetja e Beogradit, presidentit Aleksandër Vuçiq, Qeverisë së Serbisë, Zyrës për Kosovë e Metohi dhe Drejtorit të Zyrës, Petar Petkoviqit, është diçka që na jep forcë dhe dërgon mesazh se nuk jemi vetem në  luftën aspak e lehtë për drejtësinë dhe të vërtetën. Kjo është pikërisht arsyeja pse ne do të fitojmë sido që të jetë, e vërteta do të fitojë.