Shahini: Edhe këtë verë i pranishëm trendi i migrimeve të punës drejt BE-së, më të kërkuar ndërtimtarët, punëtorët e mikpritjes dhe personeli mjekësor

Kryetari i Aleancës së Biznesit të Kosovës, Agim Shahini, deklaron se rajoni edhe këtë vit shënon trend të vazhdueshëm të “migrimeve të punës” drejt Bashkimit Evropian dhe se më të kërkuarit janë ndërtimtarët, punëtorët e sektorit të mikpritjes dhe punonjësit shëndetësorë.

“Edhe këtë verë shënojmë rritje të migrimeve të punës nga rajoni drejt vendeve të BE-së, më së shumti drejt Gjermanisë, Austrisë, Sllovenisë dhe Kroacisë. Punëtorët largohen për shkak të pagave më të mira, kontratave më të sigurta dhe mundësive për punë sezonale në ndërtimtari, turizëm, bujqësi dhe shëndetësi,” deklaroi Shahini për Kosovo online.

Duke komentuar raportin e fundit të Komisionit Evropian për Ballkanin Perëndimor dhe Turqinë, i cili thekson uljen e papunësisë në rajon, Shahini vëren se rritja e punësimit është ngadalësuar në vetëm 0.2 për qind.

“Kjo tregon se tregu i punës ende ndjen pasojat e ngadalësimit të aktivitetit ekonomik,” thekson ky ekspert.

Kosova, sipas tij, nuk bën përjashtim kur bëhet fjalë për profesionet më të kërkuara.

Shahini specifikon se më shumë vende pune ka në ndërtimtari, sektorin e teknologjisë së informacionit, tregti, logjistikë dhe turizëm.

“Më të kërkuarit janë shoferët, zanatçinjtë, programuesit, por edhe punëtorët në prodhim dhe punëtorët sezonalë në turizëm,” precizon ai.

Ai shpjegon se të rinjtë që sapo kanë mbaruar arsimin e tyre e kanë më të vështirë të gjejnë një punë, si dhe punëtorët që kanë humbur vendet e tyre të punës dhe u mungojnë aftësitë dixhitale.

"Gratë e kanë më të vështirë të gjejnë punë, veçanërisht në zonat rurale ku nuk ka mundësi të mjaftueshme dhe vende pune fleksibile", thotë Shahini.

Sipas të dhënave të Aleancës së Biznesit të Kosovës, të rinjtë janë më të gatshëm të rikualifikohen për profesione që kërkohen në tregun e punës, por se nevojitet mbështetje më e fortë institucionale.

"Një mbështetje më e fortë institucionale përmes trajnimit praktik është e nevojshme për të përshpejtuar këtë proces dhe për ta përafruar atë me nevojat reale të ekonomisë", beson Shahini.

Dhe ndërsa profesionet më të kërkuara janë në sektorin e IT-së, prodhimit, logjistikës dhe shërbimeve, profesionet tradicionale administrative dhe profesionet që nuk janë përshtatur me teknologjitë e reja janë më pak të kërkuarat në Kosovë.

"Në ABK, ne besojmë se çelësi për uljen afatgjatë të papunësisë dhe ndalimin e migrimit është investimi më i madh në arsim, aftësi dixhitale dhe lidhja e arsimit me nevojat reale të tregut të punës. Vetëm kështu mund ta mbajmë fuqinë punëtore në vendet tona dhe të zvogëlojmë diferencën krahasuar me BE-në", përfundoi Shahini.