Avokatët e Dragisha Millenkoviqit: Përfundoi një gjyq i inskenuar, dëshmitarët tregojnë histori të mësuara përmendësh

Avokatët mbrojtës të Dragisha Millenkoviqit, i akuzuar për një krim lufte të supozuar kundër të burgosurve shqiptarë gjatë konfliktit në Kosovë, janë të një mendimi se vendimi për klientin e tyre duhet të jetë lirues.

Avokati Zhivojin Jokanoviq deklaroi se sot është përfunduar një nga gjyqet e inskenuara, në të cilin po gjykohej një roje burgu pas 26 vitesh, gjë që, siç theksoi ai, është e paqëndrueshme nga pikëpamja juridike.

“E çuditshme, juridikisht e paqëndrueshme… Që tani njerëzit të kujtojnë se dikur janë maltretuar atje. Ajo që karakterizon këtë dhe gjyqe të ngjashme është fakti se të dëmtuarit nuk paraqiten vetë, por thirren dhe kushdo që pranon të thotë diçka që i përshtatet aktakuzës, propozohet si dëshmitar dhe merr rolin e të dëmtuarit,” tha Jokanoviq për gazetarët.

Ai shtoi se dëshmitarët tregojnë histori të mësuara përmendësh, ndërsa trupi gjykues ka vështirësi të vendosë se çfarë është krim lufte dhe çfarë jo.

“Tregojnë një histori të mësuar përmendësh, veçanërisht lidhur me transferimin pas bombardimeve, kur institucioni korrektues në Dubravë u zhvendos në Lipjan. Në fund të fundit, problemi për trupin gjykues sot është nëse kjo përbën krim lufte. Krimi i luftës lidhet me pjesëmarrësit e konfliktit, me forcat e armatosura dhe sjelljen e tyre ndaj civilëve, dhe duhet të lidhet drejtpërdrejt me luftën dhe veprimet ushtarake. Nëse kjo mungon, nuk mund të quhet krim lufte. Rojet e burgjeve nuk kryejnë akte të tilla, ata veprojnë njësoj para dhe pas luftës, duke ndjekur rregullat e shërbimit,” shpjegon Jokanoviq.

Avokati Dejan Vasiq thekson se në fjalën e tij përfundimtare ka përmendur se kanë hequr dorë nga disa dëshmitarë sepse nuk kanë dashur të kenë probleme.

"Ne hoqëm dorë nga një numër i caktuar i dëshmitarëve që ishin roje të burgut në atë kohë dhe tani janë roje. Disa kolegë të tyre dëshmuan dhe ishin dukshëm të frikësuar gjatë dëshmisë. Ne nuk donim t'i ekspozonim në asnjë problem dhe për këtë arsye hoqëm dorë. Për këtë fola në fjalën përfundimtare, duke iu referuar edhe të dëmtuarve, se Dragisha për hir të familjes heshti për disa detaje, të cilat ndoshta mund të jenë të sikletshme dhe të tregojnë se ata nuk ishin heronjtë që u përpoqën të paraqiteshin në shqyrtimin kryesor”, tha Vasiq.

Vasiq thekson se në bazë të procedurave gjyqësore, ata presin një lirim.

Dënimi për rastin e Dragisha Milenkoviq është caktuar për 16 prill në ora 13:15.