Andriq Rakiq: Posta e Kosovës nuk do të mund të ofrojë shërbimet e nevojshme për serbët në veri

Hapja e Postës së Kosovës në komunat me shumicë serbe nuk do të ketë asnjë ndikim tek qytetarët nga veriu i Kosovës sepse nuk do të mund të ofrojë shërbimet që u nevojiten, ka treguar menaxherja e programit të OJQ-së Nisma e Re Sociale Millica Andriq Rakiq.

"Posta e Kosovës nuk komunikon me Postën serbe, kështu që pa marrëveshje sigurisht që askush nuk mund të dërgojë letër Beogradit apo të dërgojë letër nga Beogradi në Mitrovicë përmes asaj poste”, ka thënë Andriq Rakiq për Danas.

Ajo thekson se Posta e Kosovës ka qenë në dispozicion të qytetarëve 400 metra nga ajo për të cilën ishte paralajmëruar hapja, në Mitrovicën e Jugut, por shton se nevojat e qytetarëve kryesisht janë të drejtuara drejt Serbisë ose dërgesave nga Serbia, e jo në pjesën tjetër të Kosovës.

Si problem të veçantë thekson faktin se Posta e Kosovës nuk mund të dorëzojë apo të bëjë pagesa të pensioneve dhe përfitimeve sociale të Serbisë.

Edhe pse zyrat e postës së Kosovës do të jenë të hapura në veri, shërbimet që mund t'u ofrojë qytetarëve nga veriu janë të pakta, kështu që serbët e Kosovës do të duhet të udhëtojnë ende në brendësi të Serbisë.

Si shembull, Andriq Rakiq thotë se për të dërguar një dërgesë në Beograd, ajo duhej ta bënte atë në Rashkë.

“Ne e kemi shfrytëzuar postën në Mitrovicën Jugore disa herë deri më tani kur kemi dërguar ankesa te Avokati i Popullit ose kallëzime penale në prokuroritë jashtë Mitrovicës”, tha ajo.

Megjithatë, nevojat e qytetarëve të zakonshëm për postë të Kosovës reduktohen në një ose dy herë në vit, ndërsa nevojat për Postë serbe janë pothuajse ditore, përfundoi Andriq Rakiq.