Bishevac: Sorensen ka mbështetjen e BE për të zhbllokuar dialogun, por do të duhet shumë përpjekje

Mesazhet që Peter Sorensen, përfaqësuesi special i Bashkimit Evropian për dialogun Beograd-Prishtinë, ua ka përcjellë dje autoriteteve në Prishtinë, se dialogu nuk ka alternativë dhe duhet të zhbllokohet sa më shpejt, sipas vlerësimit të anëtarit të kryesisë së Listës Serbe, Nemanja Bishevac, ishin krejtësisht i pritshme. Ai shton se edhe pse Sorensen është një diplomat me përvojë, do të duhet shumë përpjekje për të zhbllokuar dialogun dhe për ta çuar atë në drejtimin e duhur.

Sorensen, sipas Bishevac, ndoshta ka mbështetje më të fortë nga Bashkimi Evropian sesa paraardhësi i tij Miroslav Lajçak, për të zhbllokuar dialogun, por ai thotë se autoritetet në Prishtinë kanë treguar në periudhën e kaluar se nuk janë aspak të disponuar për dialog, edhe pse Beogradi ka përmbushur gjithçka që i është kërkuar gjatë 12 viteve të fundit.

"Mendoj se do të duhet shumë përpjekje, edhe pse zoti Sorensen është një diplomat me përvojë, për të zhbllokuar dialogun dhe për të ecur në drejtimin e duhur. E pamë se ai ka pasur takime edhe me liderët e opozitës, që do të thotë se as Bashkimi Evropian nuk ka vizion se kush do të jetë në pushtet në Prishtinë", thotë Bishevac.

Ai gjithashtu thekson se gjëja e parë që ra në sy të popullit serb në Kosovë për vizitën e parë të Sorensen në Kosovë ishte data e vizitës së tij, 17 marsi, e cila, siç thotë ai, është gdhendur thellë në kujtesën e mbarë popullit serb si një nga datat e tij më tragjike.

Në krahasim me Lajçakun, Sorensen, vlerëson Bishevac, ka një energji më të madhe, edhe pse thotë se kjo mund të jetë vetëm energji fillestare dhe se si do të zhvillohet situata më tej, mbetet të shihet.

“Kur të shkojë në Beograd, mesazhet e Sorenessen-it ndoshta do të jenë të njëjta si në Prishtinë, mirëpo, duke u mësuar nga përvojat e viteve të kaluara, ndoshta do të jetë më i ashpër ndaj Beogradit, edhe pse Beogradi është ai që bëri gjithçka për ta mbajtur gjallë atë dialog dhe, në një farë mënyre, ekziston ende”, thotë bashkëbiseduesi ynë.