Brnabiq iu përgjigj Berbokut: Niveli befasues i absurditeti, ju injoroni rezolutën e OKB-së

Kryeministrja serbe, Ana Brnabiq, i është përgjigjur pretendimit të Ministres së Jashtme gjermane, Anallena Berbok, se kthimi i ushtrisë serbe në Kosovë është i “papranueshëm”.

Brnabiq kujtoi në Twitter se në njoftimin e fundit të ministrave të punëve të jashtme të vendeve të G7 (14 maj 2022), në zgjidhjen e çdo problemi apo krize në botë (Libi, Siri, Jemen, Somali, etj.) u kërkua zbatimi rigoroz i rezolutave përkatëse të Këshillit të Sigurimit të OKB-së.

“Tani, çuditërisht, MPJ e Gjermanisë në mënyrë eksplicite thotë se Rezoluta 1244 e KS të OKB-së – e cila përcakton se Serbia ka të drejtë të kërkojë kthimin e një numri të caktuar të forcave të saj të sigurisë në Kosovë – duhet të injorohet, sepse është e “papranueshme”. Lidhur me të drejtën ndërkombëtare dhe stabilitetin, në bazë të cilave kritere vendosni se cila rezolutë e KS të OKB-së duhet të respektohet dhe cila duhet të injorohet - për shembull, në rastin e Libisë, Rezoluta 2571 duhet të respektohet, por në rastin e Serbisë, Rezoluta 1244 duhet të injorohet? Një nivel befasues i absurditeti", tha Brnabiq.

Ajo shtoi se e vetmja gjë që serbët në Kosovë dëshirojnë është paqja dhe stabiliteti.

“Nuk do të na shqetësonte as të respektonim të drejtën ndërkombëtare, Kartën e OKB-së, KS të OKB-së... Edhe një gjë: nuk do të kishte tensione që duhet të zvogëlohen nëse Kurti do t'i respektonte marrëveshjet dhe se nuk i ka shkelur thjeshtë në mënyrë të njëanshme”, tha Brnabiq.