Daçiq me Rouambën: Tërheqja e njohjes së Kosovës nga Burkina Faso është shumë e rëndësishme

Ministri i Punëve të Jashtme, Ivica Daçiq, falënderoi Ministren e Punëve të Jashtme, Bashkëpunimit Rajonal dhe Diasporës së Burkina Fasos, Olivia Ragnanevende Rouamba për mbështetjen e integritetit territorial të Serbisë, e cila, siç tha ai, është e një rëndësie të jashtëzakonshme, pasi që ai shtet e tërhoqi njohjen e pavarësisë së Kosovës.

Siç thuhet në njoftim, dy vendet janë të lidhura me miqësi tradicionale, e cila duhet të forcohet me përpjekje të përbashkëta, sidomos në dritën e 55 viteve nga vendosja e marrëdhënieve diplomatike mes dy vendeve.

Ministri Daçiq theksoi përkushtimin e Serbisë për ruajtjen e stabilitetit në rajon, që është pikënisja themelore dhe e pandryshuar e politikës së saj të jashtme, duke shtuar se Burkina Faso tërhoqi njohjen e pavarësisë së Kosovës në janar.

“Në janar të këtij viti Burkina Faso e tërhoqi vendimin për njohjen e të ashtuquajturës Kosovë dhe deklaruan se respektojnë integritetin territorial të Serbisë. Për ne kjo çështje është shumë e rëndësishme, 28 shtete kanë tërhequr njohjen e Kosovë, dhe për ne është e rëndësishme që Kosova të mos mund të bëhet anëtare me votim në Asamblenë e Përgjithshme të OKB-së dhe në këtë mënyrë praktikisht ta bëjë të pakuptimtë çdo dialog. Duke pasur parasysh gjithë këtë, 11 vjet që kur ka ekzistuar ky koalicion me Aleksandër Vuçiqin dhe PPS, ne kemi arritur ta kthejmë çështjen në pozicione që i korrespondojnë Serbisë, që do të thotë se nëse Kosova do të aplikonte për t'u bërë anëtare e OKB-së, nuk do të mund të merrte më shumë se 80 vota nga 193 anëtarë të OKB-së. Do të ishte domethënëse për ne, sigurisht e kemi shpjeguar se çfarë do të thotë, nëse është një çështje e integritetit territorial, që është një nga temat e rëndësishme për Burkina Fason, kemi dashur të kuptohet se kjo është një shkelje drastike e integritetit territorial të Serbisë, në kundërshtim me të gjitha normat ligjore, por ne nuk duam t'i reduktojmë marrëdhëniet tona vetëm në çështjen e marrëdhënieve me Kosovën, ne duam të kemi marrëdhënie strategjike me Burkina Faso dhe një numër vendesh të tjera afrikane, sepse ne kemi një interes të përbashkët, me vite kemi qenë viktimë e standardeve të dyfishta në marrëdhëniet ndërkombëtare dhe se mund të kërkojmë interesa të përbashkëta në fusha të ndryshme”, tha Daçiq.

Shefi i diplomacisë së Burkina Fasos e njoftoi Daçiqin me situatën me të cilën po përballen qytetarët e vendit të saj, duke theksuar se siguria e qytetarëve dhe rajonit është parakusht për zhvillimin e vendit.

“Ju e dini se që nga viti 2015, Burkina Faso po përballet me një fenomen të tmerrshëm, terrorizmin që vë në pikëpyetje familjet dhe ushtrinë dhe që ka luajtur në mënyrë perfide. Ai nuk mund të përballet me ushtrinë tonë, bëhet fjalë për infiltrim, manipulim. Falë forcave tona të mbrojtjes ne do të qëndrojmë. Kur Ibrahim Traore erdhi në pushtet, ai i vuri vetes katër prioritete, e para ishte lufta kundër terrorizmit, rikthimi i tërësisë territoriale të Burkina Fasos dhe kur flisni për çështjen e integritetit territorial të vendit tuaj, ne e kuptojmë, sepse është prioriteti ynë. Sovraniteti, qoftë politik apo territorial, nuk vihet në dyshim, nuk negociohet. Burkina Faso nuk dëshiron të heqë dorë as edhe një metër katror të asnjë toke. Ne nuk mund të mos mbështesim vendet që janë në këtë lloj dinamike, në dëshirën për të ruajtur integritetin e tyre territorial”, tha ministrja Rouamba.

Bashkëbiseduesit ranë dakord se është e nevojshme të forcohet bashkëpunimi mes dy vendeve si në planin politik ashtu edhe në atë ekonomik, duke përfshirë shkëmbimin e vizitave në nivelin më të lartë.