Daçiq: Serbia do të paraqesë kandidaturën për Këshillin Ekzekutiv të UNESCO-s

Serbia do të paraqesë një kandidaturë për Këshillin Ekzekutiv të UNESCO-s, deklaroi sot ministri i Punëve të Jashtme Ivica Daçiq.

Në fjalimin e tij në seancën e 42-të të Konferencës së Përgjithshme të kësaj organizate në Paris, Daçiq theksoi se në këtë synim pret mbështetjen e anëtarëve të tjerë të UNESCO-s, duke shtuar se Serbia do ta arsyetojë këtë besim.

Duke folur për situatën botërore, Daçiç vuri në dukje se në dritën e trazirave në rritje, mirëkuptimi i ndërsjellë dhe gatishmëria për kompromis po fitojnë gjithnjë e më shumë rëndësi.

Në fjalën e tij ai iu referua trashëgimisë kulturore të rrezikuar në Kosovë, e cila është nën mbrojtjen e UNESCO-s.

“Një nga detyrat tona prioritare është ndërgjegjësimi për kërcënimin në rritje të trashëgimisë botërore, për shkak të faktorëve të ndryshëm si ndryshimi i klimës, konfliktet e armatosura dhe mungesa e shpeshtë e aplikimit të masave adekuate të rekomanduara nga instrumentet normative në këtë fushë. Kulmi i artit mesjetar serb paraqitet në mënyrën më përfaqësuese në katër manastire serbe në Kosovë dhe Metohi, të regjistruara në Listën e Trashëgimisë Botërore: Deçani, Graçanica, Patriarkana e Pejës dhe Virgjëresha Ljevishka. Trashëgimia kulturore dhe historike serbe në Kosovë dhe Metohi, ku ka 1300 vende të shenjta, është e një rëndësie të pamatshme, jo vetëm kur bëhet fjalë për identitetin kombëtar të Serbisë, por edhe përfaqëson një pjesë të trashëgimisë së vlefshme evropiane dhe botërore”, ka theksuar Daçiq.

Siç u shpreh, ajo trashëgimi është vazhdimisht e ekspozuar ndaj përpjekjeve për riemërtim, rishikim të fakteve të pamohueshme historike dhe përdhosje fizike.

“Forcat ndërkombëtare, me detyrën e mbrojtjes së trashëgimisë kulturore serbe dhe botërore, janë të dislokuara vetëm në disa asete kulturore. Besoj se ju jeni të vetëdijshëm për faktet tragjike, kur është fjala për trashëgiminë tonë kulturore në Kosovë dhe Metohi dhe kërcënimin e përhershëm të mbrojtjes së saj”, ka thënë Daçiq.

Ai tha se Serbia do të vazhdojë të avokojë kundër politizimit të trashëgimisë kulturore dhe çështjeve tjera në kompetencë të asaj organizate, si dhe kundër shkaktimit të ndarjeve, tensioneve dhe konfrontimeve të reja brenda vetë UNESCO-s.

“Ne besojmë se detyra jonë e përbashkët është të përpiqemi të reduktojmë tensionet dhe ndarjet që shënuan periudhën e kaluar. Ajo që na nevojitet, veçanërisht në kohë përçarjesh, trazirash dhe konfliktesh në botë, është mirëkuptimi dhe gatishmëria më e madhe për kompromis. Në atë masë, bashkëpunimi ynë brenda UNESCO-s është po aq i rëndësishëm, si për sot ashtu edhe për të gjithë brezat e ardhshëm. Jini të bindur në gatishmërinë e Republikës së Serbisë që të vazhdojë të kontribuojë në mënyrë aktive në këtë Organizatë të rëndësishme dhe shpresoj edhe përmes vazhdimit të punës sonë në Këshillin Ekzekutiv të UNESCO-s”, përfundoi Daçiq.

Ambasadorja e Serbisë në UNESCO, Tamara Rastovac Siamashvilli, së fundmi ka deklaruar për Kosovo online se Serbia ka shanse të mëdha për t'u rizgjedhur në atë organ dhe se kandidatura e paraqitur sërish nga Beogradi zyrtar për anëtarësim në Këshillin Ekzekutiv të UNESCO-s u prit mirë nga vendet anëtare.

Ajo po ashtu tha se kërcënimi i trashëgimisë kulturore dhe fetare serbe në Kosovë është një nga prioritetet absolute në veprimin e delegacionit të përhershëm të Serbisë në atë organizatë dhe shtoi se UNESCO nuk e vë në dyshim që pasuritë kulturore në Kosovë i takojnë Serbisë.

Begoviq për rolin e shkencës në arritjen e përshpejtuar të qëllimeve të zhvillimit të qëndrueshëm

Ministrja e Shkencës, Zhvillimit Teknologjik dhe Inovacionit, Jellena Begoviq, foli në një panel në kuadër të sesionit të 42-të të Konferencës së Përgjithshme të UNESCO-s në Paris, me temën: "Si mund të ndihmojë shkenca realisht për të arritur me shpejtësi 17 qëllimet e zhvillimit të qëndrueshëm?"

Ajo beson se është shkenca ajo që mund të kontribuojë në zgjidhjen e problemeve universale për të cilat i gjithë njerëzimi ka rënë dakord.

“Vetëm 15 për qind e treguesve që maten për arritjen e këtyre qëllimeve janë arritur. Kjo do të thotë se jemi ngadalësuar dhe duhet të ndryshojmë qasjen”, tha ministri në një deklaratë për Tanjug.

Sipas saj, kjo qasje e re duhet të përfshijë talentet e rinj, shkencëtarë të cilët duhet të përshpejtojnë procesin e arritjes së synimeve të zhvillimit të qëndrueshëm.

Begoviq tregoi se Serbia ka dhënë kontributin e saj në zgjidhjen e këtij problemi duke inicuar Rezolutën "Dekada Ndërkombëtare e Shkencës për Zhvillim të Qëndrueshëm 2023-2024", e cila u përkrah dhe u miratua njëzëri në OKB.

Ministrja po ashtu përmendi se tani janë duke u bërë formimi i organeve të ndryshme dhe krijimi i planeve për aplikimin e shkencës në Serbi, dhe në nivel lokal, për të arritur qëllimet e zhvillimit të qëndrueshëm.

“Këto janë probleme globale që kërkojnë bashkëpunim ndërkombëtar”, ka përfunduar Jellena Begoviq.