Deleviq dhe Vasiq: Dëshmitari përmendi për herë të parë Pantiqin, do të kërkojmë hetim ndaj UNMIK-ut dhe EULEX-it për fshehjen e deklaratave

Avokatët e mbrojtjes në rastin kundër Zharko Zariq dhe Momir Pantiq, Millosh Deleviq dhe Dejan Vasiq, theksuan se dëshmitari që dëshmoi sot në gjyq përmendi për herë të parë Pantiqin, edhe pse në deklaratën e tij të vetme, të cilën e posedojnë mbrojtja dhe prokuroria, ai nuk përmendet fare. Ata po ashtu theksuan se do të kërkojnë të hetohet kush në UNMIK dhe EULEX i ka fshehur deklaratat, nëse ato me të vërtetë ekzistojnë, siç pretendon prokuroria.

Deleviq theksoi se dëshmitarët sillen “sikur të ishin zgjuar nga gjumi dimëror”.

„Për herë të parë pas 25 vitesh përmend Momir Pantiqin, megjithëse në deklaratën e tij nuk e ka përmendur asnjëherë. Mendoj dhe dyshoj me të drejtë se ky dëshmitar ka marrë udhëzime se çfarë duhet të thotë sot në seancë,“ tha Deleviq.

Vasiq theksoi se nuk dëshiron ta komentojë dëshminë, por do të ndalet te një prirje që, siç theksoi ai, po merr përmasa shqetësuese – që dëshmitarët e pyetur pretendojnë se u kanë dhënë deklarata EULEX-it dhe UNMIK-ut, ndërsa Prokuroria Speciale pretendon se ato deklarata nuk ekzistojnë.

„Dua të them se nuk e vë në dyshim atë që ka thënë prokurori dhe kam besim në Prokurorinë Speciale. Megjithatë, të hënën do të kërkoj nga përfaqësuesit e UNMIK-ut dhe EULEX-it hetimin më urgjent se cilët nga zyrtarët e tyre i kanë fshehur ato deklarata nga ne dhe nga Prokuroria Speciale. Ato deklarata ekzistojnë, dhe ata pretendojnë se ua kanë dhënë Prokurorisë Speciale. Nëse prokuroria nuk i ka, siç pretendon, atëherë dikush nga UNMIK-u dhe EULEX-i i ka fshehur ato,“ tha Vasiq.