Drecun: Kam frikë se nuk do të ketë deeskalim në Kosovë, Kurti nuk po ndryshon sjelljen

Kryetari i Komisionit Parlamentar për Kosovë dhe Metohi, Milovan Drecun, ka theksuar se ka frikë se për shkak të sjelljes së kryeministrit të Kosovës, Albin Kurti, e cila, siç thotë, është konstatuar, nuk do të ketë zgjidhje për deeskalimin e situatës në veri të Kosovës, raporton Pink.

"Ata hap pas hapi po i realizojnë disa nga qëllimet e tyre  dhe qëllimi përfundimtar është që serbët të mos mbijetojnë atje dhe të kryejnë spastrim etnik," tha Drecun.

Ai shtoi se Kurti sigurisht që nuk do ta zbatojë AKS.

“Fakti që është qetësuar situata për momentin nuk do të thotë se nuk do të ketë tensione. Ai gjithmonë mund të akuzojë dhe arrestojë një serb pa arsye, të gjitha me qëllim të frikësimit”, tha Drecun.

Ai ka theksuar se kur është fjala për deeskalimin, Prishtina tashmë po i shmanget mbajtjes së zgjedhjeve të reja në veri të Kosovës.

“Nuk janë duke punuar për AKS, po pezullohet ndërtimi i objekteve të shumta, po marrin vendime për urën në lumin Ibër e të ngjashme. Aktakuza të rrejshme po ngrihen, po përgatitet terreni për eskalim të mëtejmë”, tha Drecun.

Ai theksoi se është bërë një manovër politike.

“Ata gjoja tërhoqën disa policë dhe më pas Bisljimi pyet pse BE-ja nuk i tërhoqi sanksionet”. Mendoj se duhet të paraqitet menjëherë një plan, sipas të cilit do të realizohet marrëveshja”, tha Drecun.

Sipas tij, presidenti i Serbisë, Aleksandar Vuçiq, e ka thënë qartë qëndrimin e Beogradit dhe nuk do ta ndryshojë atë, ndërsa, shton ai, Prishtina mendon se çështja e Kosovës është punë e kryer, e cila, siç thotë ai, është absurde.

“Ata AKS e shohin në përputhje me kushtetutën e Kosovës, e jo sipas marrëveshjes së Brukselit”, ka përfunduar Drecun.