Drecun: Pozicioni ynë është i qartë - fillimisht BKS dhe më pas vazhdimi i dialogut, plani i propozuar nuk ofron zgjidhje përfundimtare

Kryetari i Komisionit të Kuvendit të Serbisë për Kosovë e Metohi, Millovan Drecun, ka vlerësuar sot se nuk e sheh qëllimin e takimit të presidentit të Serbisë, Alleksandar Vuçiq, me kryeministrin e Kosovës, Albin Kurtin, nëse ai nuk është i përkushtuar ndaj Bashkësisë së Komunave Serbe dhe themelimit të tij, duke nënvizuar se qëndrimi i Beogradit është se deri sa të krijohet Bashkësia nuk ka vazhdim të dialogut, as shqyrtim të propozimit evropian.

“Ishte thënë qartë se fillimisht duhet të formohet BKS për të vazhduar dialogun. Proceduralisht, sipas asaj që shkruhet në Marrëveshjen e Brukselit, nëse do të ketë harmonizim të qëndrimeve në lidhje me kompetencat e BKS-së, duhet të mbahet një takim në krye ku do të prezantohej statuti, dhe pas kësaj qeveria në Prishtinë vetëm duhet ta fusë Bashkësinë në rendin ligjor”, ka shpjeguar Drecun për TV Prva, i pyetur nëse do të ketë së shpejti një takim mes presidentit Vuçiq dhe Kurtit, siç njoftoi BE-ja.

Siç parashikon Marrëveshja e Brukselit dhe plani i zbatimit, duhet të mbahet një takim i nivelit të lartë për të shqyrtuar statutin e BKS-së.

“Megjithatë, nëse shikoni të dërguarin e BE-së, Miroslav Lajçak, ai nuk iu përgjigj as letrës së ekipit menaxhues të prillit, kur ishte thënë se ekipi ynë ka gati një draft statut, që tregon se ai nuk është i interesuar për BKS-në siç parashihet në Marrëveshjen e Brukselit, por një BKS tjetër më e pranueshme për Prishtinën. Unë nuk e shoh qëllimin e organizimit të një takimi në Bruksel nëse ai nuk do t'i kushtohej BKS-së dhe më pas do të formohej BKS," shpjegoi Drecun.

Ai vlerësoi se Brukseli ka plane të ndryshme, andaj flet për faktin se brenda disa javësh duhet të organizohet një takim, për të zbatuar planin franko-gjerman, i cili, nënvizon, nuk është i pranueshëm në pjesë kyçe për Serbinë.

“Ka diçka që është obligim ligjor, ajo është BKS. Qëndrimi ynë është që derisa të realizohet kjo, nuk ka vazhdim të dialogut dhe as shqyrtim të propozimit evropian”, nënvizoi Drecun.

Ai ka thënë se qëndrimi i SHBA-së është i fortë se BKS duhet të zbatohet, sepse e kanë të qartë se nuk mund ta thyejnë vullnetin e Beogradit dhe për këtë po i bëjnë presion Prishtinës.

Drecun, lidhur me kushtet për formimin e BKS-së të paraqitura së fundmi nga Kurti, vlerësoi se ato janë identike me atë që thotë propozimi franko-gjerman.

“Ai thotë fillimisht njohje ndërkombëtare, pastaj flet për të drejtat e pakicave kombëtare. Kështu thuhet edhe në propozim - së pari marrëveshja themelore, e cila nuk përfshin njohjen reciproke, dhe në fund përmendet se duhet të përmbushet gjithçka që është dakorduar më parë. Kushtet e tij janë mjaft në përputhje me atë që thuhet në propozim. Ai është i kënaqur me planin që i është ofruar”, theksoi ai.

Drecun vlerësoi se zyrtarët evropianë nuk dëgjojnë çfarë thotë Beogradi.

“Mesazhi im për ta është të dëgjojnë më me kujdes, sepse ajo që thamë është diçka që nuk do ta kapërcejmë. Ne nuk do të pajtohemi me anëtarësimin në OKB dhe njohjen e pavarësisë as de fakto as de jure”, nënvizoi ai.

Drecun theksoi se pavarësisht presionit në rritje ndaj Serbisë, Kosova është një problem kompleks që nuk mund të zgjidhet shpejt, sidomos jo në bazë të asaj që ofron Perëndimi.

“Ky nuk është një plan që do të mundësonte një zgjidhje afatgjatë, por do të na çonte në konflikte dhe incidente të reja”, theksoi ai.

Drecun theksoi se Serbia ka nevojë për një partneritet strategjik me SHBA-në dhe se ambasadori në Uashington, Marko Gjuriq, po bën një punë të shkëlqyer në këtë drejtim.