Drecun: Rrjeti radikalë islamik është zgjeruar ndjeshëm në Kosovë

Kryetari i Komisionit parlamentar për Mbrojtje dhe Punë të Brendshme, Milovan Drecun, ka deklaruar se rrjeti i islamistëve radikalë në Kosovë është zgjeruar dukshëm dhe se vlerësimet sugjerojnë se aktualisht janë nga 5 deri në 6 mijë të tillë.

“Rrjeti i islamistëve radikalë në Kosovë dhe Metohi është zgjeruar ndjeshëm vitet e fundit, si gjeografikisht ashtu edhe në kapacitetin njerëzor. Ka rekrutim të vazhdueshëm të anëtarëve të rinj bazuar në këtë interpretim radikal të Islamit. Po tërhiqen sidomos të rinjtë”, thotë Drecun për Kosovo online.

Ai saktëson se islamistët radikalë kanë qenë më parë të pranishëm vetëm në disa pjesë të Kosovës, si në Kaçanik dhe në Mitrovicën e Jugut, por se janë përhapur edhe në perëndim, në rajonin e Pomoravljes së Kosovës deri në Preshevë, Bujanoc dhe Medvegjë.

"Numri i përgjithshëm i anëtarëve të kësaj lëvizje radikale islamike vlerësohet të jetë midis 5.000 dhe 6.000," tha Drecun.

Ai thekson se Islami radikal aktualisht nuk është shumë i dukshëm në publik dhe as anëtarët e lëvizjes nuk janë shumë aktivë.

“Por pas asaj padukshmërie në publik, ata janë shumë të pranishëm. Ata kanë qenë gjithmonë një lloj mbështetjeje rezervë për të gjitha planet e Prishtinës për veprime kundër popullit serb”, pohon Drecun.

Falë ndihmës nga vendet sunite dhe islame, paralajmëron ai, ata kanë filluar të marrin nën kontroll bashkësinë islame në Kosovë.

“Ajo që është veçanërisht shqetësuese është se islamistët radikalë, me ndihmën e hoxhallarve që vijnë nga ato vende sunite dhe islamike, Arabia Saudite, Katari dhe vende të tjera, gradualisht po marrin dominimin në bashkësinë islame të Kosovës, nëse nuk e kanë marrë tashmë. Në fakt, i gjithë ky grup islamistësh radikalë përfaqëson një burim të mirë të rekrutimit të xhihadistëve. Kjo është sigurisht shqetësuese sepse është një formacion aktiv," thekson Drecun.

Ai thekson se në Siri është aktiv formacioni ushtarak “Xhemati Shqiptar”, ku bën pjesë grupi i posaçëm luftarak “Delta”.

“Atje ka islamikë radikalë nga Kosova, Maqedonia e Veriut dhe Shqipëria”, saktëson Drecun.

Duke komentuar aktakuzën e fundit kundër një ish-anëtari të Frontit Al Nusra, Drecun beson se Prishtina po zhvillon procedura kundër ish-xhihadistëve "pro forma".

“Duke marrë parasysh se të paktën 500 islamikë radikalë nga Kosova morën pjesë në radhët e Shtetit Islamik, aq pak janë ndjekur penalisht. Një numër prej tyre vdiqën në fushën e betejës, shumë prej tyre u kthyen dhe tani janë praktikisht 'të fjetur'. Pyetja është pse Prishtina nuk ka ngritur shumë e më shumë aktakuza dhe nuk ka ndjekur penalisht shumë prej tyre. Prishtinës, por edhe disa shërbimeve perëndimore, ndoshta i shkon për shtat që këta xhihadistë me përvojë luftarake nuk janë në burgje, por janë të disponueshëm për disa fusha të reja beteje të xhihadit që do të aktivizohen në të njëjtën mënyrë si më parë, me pjesëmarrjen e disa shërbimeve të inteligjencës perëndimore dhe shërbejnë si një lloj rezerve në Kosovë e Metohi. Prandaj nuk ka ndjekje masive”, është i bindur Drecun.