Eskobar: Marrëveshja e normalizimit hap një epokë paqësore të marrëdhënieve ndërmjet Kosovës dhe Serbisë

Përfaqësues i administratës amerikane për Ballkanin Perëndimor, Gabrijel Eskobar, ka theksuar se Marrëveshja për normalizimin e marrëdhënieve ndërmjet Serbisë dhe Kosovës, nëse zbatohet siç duhet, mund të hapë një epokë të re të marrëdhënieve paqësore mes dy palëve, raporton Zëri i Amerikës.

Eskobar thekson se kjo është një marrëveshje e jashtëzakonshme.

“Është një marrëveshje për normalizimin e marrëdhënieve mes dy fqinjëve, siç do ta cilësoja unë, armiqësore, për normalizimin dhe marrëdhëniet paqësore, sipas standardeve evropiane dhe në përputhje me kuadrin evropian, atë që ne e donim.

Kjo është arsyeja pse është në vetvete një arritje e jashtëzakonshme”, shpjegoi Eskobar në një intervistë për Zërin e Amerikës.

Eskobar tha se Bashkimi Evropian ka vendosur një "orar agresiv" në një përpjekje që të gjitha pikat e marrëveshjes së arritur në Ohër të zbatohen deri në fund të vitit 2023.

Për mospjesëmarrjen e Listës Serbe në zgjedhjet e ardhshme të jashtëzakonshme në veri të Kosovës, Eskobar thotë se presidenti i Serbisë, Aleksandar Vuçiq, nuk është personi që merr vendimin përfundimtar nëse do të marrin pjesë, por se ka ndikim, duke shtuar se Lista Serbe ishte e vendosur të mos marrë pjesë në zgjedhje për arsyet e veta.

Eskobar tregon se gjatë bisedës me Vuçiqin ka vërejtur se e shqetësojnë disa gjëra.

“Ai është shumë i shqetësuar për kushtet në të cilat jetojnë serbët aktualisht, është e vërtetë se ekziston një shkallë e caktuar e izolimit të atij komuniteti nga pushteti qendror dhe ne u kemi bërë thirrje të dyja palëve që të gjejnë një zgjidhje kompromisi për këto probleme. Por kemi një situatë ku ka shumë vende vakante në institucione, të cilat duhet të plotësohen”, thotë Eskobar.

Eskobar thekson se është e rëndësishme që edhe Serbia edhe Kosova të afrohen me institucionet euroatlantike dhe se qëllimi i Marrëveshjes së Ohrit nuk është anëtarësimi i Kosovës në OKB, dhe se deklarata e Vuçiqit se nuk do të lejojë anëtarësimin e Kosovës në OKB nuk e rrezikon marrëveshjen.

“Kombet e Bashkuara janë një çështje sfiduese, ajo që duhet të fokusohemi më shumë është kandidimi i tyre për në Bashkimin Evropian, afrimi me NATO-n, me të gjitha strukturat e tjera, duke përfshirë edhe afrimin me njëri-tjetrin, që do të ndikonte drejtpërdrejt në jetën e qytetarëve.

Prandaj ne po fokusohemi që përmes kësaj marrëveshjeje ta afrojmë Kosovën dhe Serbinë me Evropën dhe SHBA-në sa më shpejt që të jetë e mundur”, përfundoi Eskobar.