Gjuriq me Herathin: Mbështetja e vazhdueshme e Sri Lankës për ruajtjen e integritetit territorial të Serbisë

Ministri i Punëve të Jashtme i Serbisë, Marko Gjuriq, zhvilloi sot një bisedë telefonike me ministrin e Punëve të Jashtme, Punësimit Jashtë Vendit dhe Turizmit të Sri Lankës, Vijitha Herath, të cilit i shprehu mirënjohje për mbështetjen parimore dhe të vazhdueshme të këtij vendi për ruajtjen e sovranitetit dhe integritetit territorial të Serbisë, e cila pasqyrohet në qëndrimin e pandryshuar për mosnjohjen e pavarësisë së Kosovës.

Gjuriq dhe Herath diskutuan për përmirësimin e marrëdhënieve dypalëshe, forcimin e dialogut politik dhe mundësitë për zhvillimin e bashkëpunimit ekonomik, njoftoi Ministria e Punëve të Jashtme e Serbisë.

Sipas shefit të diplomacisë serbe, Serbinë dhe Sri Lankën, pavarësisht largësisë gjeografike, i lidhin miqësia dhe bashkëpunimi tradicional, të bazuara në parimet e Kombeve të Bashkuara dhe vlerat e Lëvizjes së Vendeve të Painkuadruara.

Gjuriq theksoi gjithashtu se për Serbinë ishte kënaqësi e veçantë që pati mundësinë të priste në Beograd delegacionin e Sri Lankës, të kryesuar nga zëvendësministri Aruna Hemachandra, në takimin përkujtimor me rastin e shënimit të 65-vjetorit të Lëvizjes së Vendeve të Painkuadruara.

„Ministri Gjuriq i shprehu mirënjohje Sri Lankës për mbështetjen parimore dhe të vazhdueshme për ruajtjen e sovranitetit dhe integritetit territorial të Republikës së Serbisë, e cila pasqyrohet edhe në qëndrimin e saj të pandryshuar për mosnjohjen e pavarësisë së shpallur në mënyrë të njëanshme të të ashtuquajturës Kosovë“, thuhet në njoftim.

Duke theksuar se ekziston një potencial i konsiderueshëm për thellimin e mëtejshëm të marrëdhënieve dypalëshe, të mbështetura në miqësinë disa dekadëshe mes dy vendeve, shefi i diplomacisë serbe vuri në dukje interesimin e Serbisë për intensifikimin e dialogut politik dhe shkëmbimin e vizitave në nivel të lartë dhe më të lartë, si dhe për përmirësimin e bashkëpunimit ekonomik.

Duke vënë në dukje potencialin për forcimin e bashkëpunimit në bujqësi dhe turizëm, shefi i diplomacisë serbe propozoi që Sri Lanka të shqyrtojë pjesëmarrjen në Panairin Ndërkombëtar të Bujqësisë në Novi Sad dhe në Panairin Ndërkombëtar të Turizmit në Beograd.

Gjuriq e ftoi Sri Lankën të marrë pjesë në ekspozitën e specializuar Expo 2027, e cila do të mbahet në Beograd nga 15 maji deri më 15 gusht të vitit të ardhshëm, duke theksuar se deri më tani pjesëmarrjen e kanë konfirmuar më shumë se 140 vende.