Gjuriq me kandidatin e Egjiptit për drejtor të përgjithshëm të UNESCO-s: Shqyrtimi i anëtarësimit të Kosovës është i papranueshëm për Serbinë

Ministri i Punëve të Jashtme të Serbisë, Marko Gjuriq, u takua me kandidatin e Egjiptit për pozitën e drejtorit të përgjithshëm të Organizatës së Kombeve të Bashkuara për Arsim, Shkencë dhe Kulturë (UNESCO), Halid El-Anani, kandidaturën e të cilit Serbia e ka mbështetur zyrtarisht.

Gjuriq ka shprehur shqetësim të thellë për shkak të sulmeve të vazhdueshme ndaj trashëgimisë kulturore dhe fetare serbe në Kosovë, veçanërisht ndaj monumenteve që ndodhen në Listën e Trashëgimisë Botërore në rrezik.

Ai theksoi se mbrojtja e tyre është çështje me përparësi të lartë për Serbinë dhe bëri thirrje për respektimin e vlerave universale dhe rëndësisë historike të kësaj trashëgimie, thuhet në komunikatën e Ministrisë së Punëve të Jashtme të Serbisë.

Shefi i diplomacisë serbe theksoi posaçërisht se shqyrtimi eventual i kërkesës së Kosovës për anëtarësim në UNESCO do të ishte absolutisht i papranueshëm për Serbinë, pasi do të çonte në ndarje të mëtejshme mes vendeve anëtare, politizim të trashëgimisë kulturore dhe do të dëmtonte seriozisht besueshmërinë e vetë organizatës.

Gjuriq tha gjithashtu se Serbia i jep rëndësi të madhe rolit dhe mandatit të drejtorit të përgjithshëm të UNESCO-s, si dhe vetë organizatës, e cila përfaqëson një nga shtyllat më të rëndësishme të sistemit multilateral.

Duke u nisur nga marrëdhëniet tradicionale miqësore dhe gjithëpërfshirëse midis Serbisë dhe Egjiptit, si dhe bashkëpunimi i suksesshëm në kuadër të organizatave ndërkombëtare, ministri theksoi se Serbia e mbështet zyrtarisht kandidaturën e El-Anani për këtë funksion të përgjegjshëm.

Gjuriq theksoi se Serbia është një partnere e sinqertë dhe e përkushtuar në ruajtjen e vlerave themelore mbi të cilat qëndron UNESCO, duke theksuar se kjo organizatë duhet të mbetet një mekanizëm për solidaritet, dialog dhe përpjekje të përbashkëta të shteteve anëtare në ndërtimin e një bote më të drejtë dhe më të qëndrueshme.