Gjuriq me Shin: Serbia i jep rëndësi të veçantë veprimit të OKB-së, presioni ndaj serbëve në Kosovë po rritet gjithnjë e më shumë

Ministri i Punëve të Jashtme të Serbisë, Marko Gjuriq, u takua me Zëvendës Përfaqësuesin Special të Sekretarit të Përgjithshëm të Kombeve të Bashkuara dhe Ushtruesin e detyrës së shefit të Misionit të OKB-së në Kosovë (UNMIK), Milbert Dongjoon Shin.

Sipas njoftimit të Ministrisë së Punëve të Jashtme të Serbisë, Gjuriq ka theksuar se Kombet e Bashkuara janë organizata ndërkombëtare më e rëndësishme kur bëhet fjalë për ruajtjen e integritetit territorial dhe sovranitetit të Republikës së Serbisë, duke nënvizuar se Serbia i jep rëndësi të veçantë veprimit të kësaj organizate.

“Ka theksuar nevojën që Misioni të vazhdojë të zbatojë plotësisht mandatin e tij në përputhje me Rezolutën 1244 të Këshillit të Sigurimit të OKB-së, e cila përbën kornizën themelore juridike për ruajtjen e paqes dhe stabilitetit në krahinën tonë jugore,” thuhet në njoftim.

Duke pasur parasysh seancën e ardhshme të Këshillit të Sigurimit të OKB-së, e cila do t’i kushtohet punës së UNMIK-ut, Gjuriq ka theksuar se për Serbinë është me rëndësi të veçantë të ruhet kontinuiteti dhe dinamika e këtyre seancave në format të hapur, në mënyrë që opinioni ndërkombëtar të informohet në mënyrë objektive për gjendjen në terren dhe për të gjitha sfidat me të cilat përballet popullsia serbe në Kosovë.

“Gjuriq e ka informuar në detaje bashkëbiseduesin për situatën aktuale në krahinë, duke theksuar presionin gjithnjë e më të madh ndaj komunitetit serb dhe ndjekjen sistematike të serbëve. Ai ka nënvizuar se sulmet e vazhdueshme dhe masat e drejtuara kundër sistemit shëndetësor, arsimor dhe gjyqësor në veri të Kosovës dhe Metohisë, si dhe mungesa e vullnetit politik të Prishtinës për të zbatuar obligimet nga Marrëveshja e Brukselit, janë mesazh dhe qëllim i qartë politik për ta vështirësuar më tej jetën e popullit serb,” shtohet në njoftim.

Gjuriq ka kujtuar gjithashtu se Bashkësia e komunave serbe, edhe pas dymbëdhjetë vitesh nga arritja e marrëveshjes, nuk është formuar, dhe se zyrtarët në Prishtinë disa herë publikisht kanë deklaruar se nuk kanë ndërmend ta bëjnë këtë, gjë që, sipas njoftimit, përbën shkelje serioze të marrëveshjeve të arritura në Bruksel.

“Ministri Gjuriq vuri në dukje se zgjedhjet lokale të ardhshme, të caktuara për 12 tetor, janë me rëndësi vendimtare për mbijetesën e popullit serb në Kosovë dhe Metohi, duke theksuar se pjesëmarrja në zgjedhje përfaqëson një mundësi që serbët në veri të krahinës të rimarrin kontrollin institucional në komunat me shumicë serbe. Ai ka vlerësuar se prania e Misionit është thelbësore për ruajtjen e paqes, stabilitetit dhe mbrojtjen e të drejtave themelore të njeriut, si dhe se është e domosdoshme që Kombet e Bashkuara të reagojnë me vendosmëri ndaj incidenteve të shumta, provokimeve dhe veprimeve të njëanshme të institucioneve të përkohshme të vetëqeverisjes në Prishtinë,” thuhet në njoftimin e ministrisë.