Vuçiq me Guterres për Kosovën, rrethanat rajonale dhe rolin e OKB-së në botën e sotme

Presidenti i Serbisë, Aleksandar Vuçiq, u takua sot në Nju Jork me Sekretarin e Përgjithshëm të Kombeve të Bashkuara, Antonio Guterres, me të cilin bisedoi për Kosovën, rrethanat rajonale dhe hapat e mundshëm për kapërcimin e sfidave, si dhe për rolin e Kombeve të Bashkuara në botën e sotme.

“Gjithmonë bisedë e mirë dhe e hapur me Antonio Guterresin, me të cilin shkëmbeva mendime për temat më të rëndësishme globale dhe çështjet kyçe për të ardhmen e botës që do t’ua lëmë brezave që vijnë. Kemi diskutuar edhe për Kosovën e Metohinë, rrethanat tona rajonale dhe hapat e mundshëm për kapërcimin e sfidave”, shkroi Vuçiq në Instagram.

Ai i përcolli Guterresit se me vëmendje të veçantë kishte dëgjuar fjalën e tij hyrëse para Asamblesë së Përgjithshme të OKB-së, si dhe mesazhet kryesore drejtuar liderëve të sotëm për të cilat të gjithë duhet të reflektojnë.

Vuçiq theksoi se veçanërisht kanë shqyrtuar çështjen e vendit dhe rolit të Kombeve të Bashkuara në një botë me ndryshime të shpejta dhe shpesh komplekse, ndikimi i të cilave e tejkalon rëndësinë lokale dhe rajonale.

“Në këtë kuptim, theksova se politika serioze, e matur, e përgjegjshme dhe racionale, si dhe kthimi në kuadër të parimeve të Kartës së OKB-së, është i vetmi rrugëtim i vërtetë drejt një bote më të drejtë dhe më të sigurt”, shtoi presidenti i Serbisë.

Vuçiq porositi se në këtë rrugë Serbia, si vend themelues i OKB-së, gjithmonë do të japë mbështetje të fortë përpjekjeve që në skenën globale të rikthehen ato parime mbi të cilat duhet të mbështeten marrëdhëniet ndërkombëtare për të gjithë aktorët, ashtu siç vepron me përkushtim vendi ynë, pavarësisht rrethanave, pengesave dhe sfidave.