Hill: Dialogu është një çështje e rëndësishme dhe e vështirë, duhet përshpejtuar

Ambasadori amerikan në Serbi, Kristofer Hill, ka vlerësuar se dialogu ndërmjet Beogradit dhe Prishtinës duhet të përshpejtohet dhe çështja e Kosovës të zgjidhet, shkruan Kurir.

"Është një nga çështjet më të rëndësishme në rajon që duhet të zgjidhet. Është një çështje e vështirë dhe toni midis dy palëve nuk është i mirë. Dialogu duhet të përshpejtohet", tha Hill në Shkup, raporton Zëri i Amerikës.

Hill, i cili mori pjesë në konferencën “Sfidat e sigurisë rajonale dhe ngjarjet e fundit në vendet e Ballkanit Perëndimor”, tha se ai ka pikëpamjen e tij se si duhet të bëhen këto gjëra, por se i respekton vërtet njerëzit që udhëheqin procesin.

"Gjuzepe Borel, Miroslav Lajçak, Gabriel Escobar, ata po japin gjithçka që munden, por është një çështje shumë e vështirë që lidhet me historinë, me luftën. Nuk është e lehtë, por duhet ta bëjnë", tha Hill.

Ai konsideron se themelimi i Bashkësisë së Komunave Serbe dhe njohja e dokumenteve të Kosovës janë çështjet kryesore të hapura në atë proces, por përkundër vështirësive të dukshme në dialog, ai thotë se është optimist sepse të paktën ka bisedime mes dy palëve.

Hill vlerëson se iniciativa rajonale “Ballkani i Hapur” mund të ndihmojë në uljen e tensioneve dhe nuk ka dyshim se zgjatja e tensioneve ndërmjet Serbisë dhe Kosovës do të jetë e dëmshme për rajonin, gjë që, siç theksoi, mund ta shfrytëzojnë lojtarët e tjerë.