Hovenijer: Sanksioni i parë për Kosovën është anulimi i stërvitjeve të përbashkëta ushtarake, po mendojmë për hapat e mëtejshëm

Ambasadori amerikan në Prishtinë, Xhefri Hovenijer, ka thënë se anulimi i pjesëmarrjes së Kosovës në stërvitjen “Defender Europe 2023” është pasoja e parë për Qeverinë e Kosovës, e cila refuzoi thirrjet e Uashingtonit për deeskalim të situatës në veri.

Sekretari amerikan i Shtetit, Entoni Bllinken, ka paralajmëruar më 26 maj se veprimet e Qeverisë së Kosovës në komunat veriore do të kenë pasoja në marrëdhëniet bilaterale.

“Indikacioni i parë për këtë ishte vendimi i marrë mbrëmë nga komandanti amerikan për Evropë për të anuluar pjesëmarrjen e Kosovës në Defender Europe 2023, që ndodhi brenda natës”, tha Hovenijer në një takim me disa gazetarë në Prishtinë.

Për Kosovën këto ushtrime kanë përfunduar, ka shtuar Hovenijer.

“Më duhet të them se për momentin SHBA-të nuk kanë shumë entuziazëm për të reaguar ndaj disa interesave të Kosovës, siç është angazhimi me vende të panjohura, apo puna aktive për përmirësimin e Kosovës në rrugën euroatlantike. Na vjen shumë keq që situata ka ardhur deri këtu, por duhet të jem i sinqertë, por kjo është situata. Shpresojmë që kryeministri Kurti të dëgjojë këshillat tona dhe të ndërmarrë menjëherë hapa për uljen e tensioneve në veri”.

SHBA kanë kritikuar Qeverinë e Kosovës duke thënë se më 26 maj kryetarët e rinj shqiptarë në komunat veriore kanë hyrë me dhunë në ndërtesat komunale në veri.

Hovenijer tha se SHBA po mendojnë edhe për vendime të tjera që do të marrë në këtë drejtim.

“Kemi kërkuar nga kryeministri i Kosovës Albin Kurti që menjëherë të ndërmarrë hapa për të qetësuar situatën në veri. Ai nuk iu përgjigj këtyre kërkesave. Prandaj po shqyrtojmë se cilat do të jenë veprimet tona të ardhshme”, tha ambasadori amerikan.

Ambasadori amerikan në Kosovë, Xhefri Hovenijer, ka thënë se Qeveria e Kosovës nuk është koordinuar me Uashingtonin për veprimet e ndërmarra të premten.

Atë ditë kryetarët e rinj shqiptarë të komunave në veri të Kosovës hynë në ndërtesat komunale me ndihmën e policisë së Kosovës.

“Kur e morëm vesh, reaguam ashpër kundër kësaj. Vendimi ndikoi negativisht në reputacionin e Kosovës dhe përmbysi përpjekjet drejt normalizimit të marrëdhënieve ndërmjet Kosovës dhe Serbisë”, ka theksuar ambasadori amerikan.

Hovenijer citoi Sekretarin Amerikan të Shtetit Bllinken kur ai tha se vendimet e fundit të qeverisë së Kosovës ndikojnë në marrëdhëniet mes dy vendeve.

“Nuk ka pasur asnjë aktivitet për Defender Europe '23 sot dhe nuk do të ketë. Për Kosovën ato ushtrime kanë përfunduar”.