Kvinta, BE dhe OSBE: Na vjen keq për vendimin e Qeverisë së Kosovës për të finalizuar shpronësimin në veri

Ambasadat e Francës, Gjermanisë, Italisë, Mbretërisë së Bashkuar dhe Shteteve të Bashkuara të Amerikës, së bashku me Zyrën e BE-së në Kosovë dhe Misionin e Organizatës për Siguri dhe Bashkëpunim Evropian në Kosovë, shprehin keqardhje për vendimin e Qeverisë së Kosovës të miratuar më 30. maj për të finalizuar shpronësimin e mbi 100 parcelave të tokës në komunat me shumicë serbe në veri të Kosovës.

Në deklaratë, ata theksuan se disa nga misionet e tyre kanë ndarë më herët me Qeverinë vlerësimet e ekspertëve juridikë ndërkombëtarë, duke përfshirë edhe Misionin e Bashkimit Evropian për Sundimin e Ligjit në Kosovë, të cilët kanë treguar se Qeveria ka shkelur ligjet dhe rregulloret e veta për shkak të mangësitë procedurale dhe teknike gjatë procesit të shpronësimit.

“Vëmë re se sistemi gjyqësor i Kosovës ka identifikuar shqetësime të ngjashme ligjore lidhur me vendimin preliminar për shpronësim, të cilin Qeveria ende nuk e ka zgjidhur”, thuhet në deklaratë.

Përderisa disa prej pronave të paditësve janë hequr nga vendimi përfundimtar për shpronësim, ata shprehen se u vjen keq që Qeveria e Kosovës nuk ka pritur që të gjitha procedurat e hapura gjyqësore të zgjidhen plotësisht para se të marrë këtë vendim.

“Duhet që Qeveria të bëjë përpjekje që aktivitetet e shpronësimit të jenë në përputhje me ligjin, të respektohet procedura ligjore dhe të respektohen plotësisht të drejtat e pronarëve të pronave dhe të palëve të interesuara”, kanë thënë ata.

Gjithashtu, ata shprehën shqetësimin e tyre në Qeveri se projektligji për shpronësimin nuk është në përputhje me zotimet që ka marrë Kosova në kuadër të Planit të Ahtisaarit dhe inkurajojnë Qeverinë që ta modifikojë ligjin në përputhje me rrethanat para miratimit të tij.

“Ne inkurajojmë Qeverinë e Kosovës që t'i përmbahet sundimit të ligjit dhe qeverisjes së mirë, si bazë e shoqërive të gjalla dhe demokratike. Gjithashtu, i bëjmë thirrje Qeverisë që të konfirmojë përkushtimin e saj ndaj parimeve të Ahtisarit, përfshirë mbrojtjen dhe promovimin e të drejtave të komuniteteve joshumicë”, thuhet në komunikatë.