Lista Serbe: Britanikët donin ta ndihmonin djalin e tyre në Prishtinë duke njollosur imazhin e serbëve të nderuar

Lista Serbe dënoi ashpër vendimin e Britanisë së Madhe për vendosjen e sanksioneve ndaj Zvonko Vesellinoviqit, Millan Radoiçiqit dhe Sllobodan Teshiqit.

“Ne dënojmë ashpër lëvizjet shpifëse të armiqve të dëshmuar të popullit serb duke futur në listën e zezë nënkryetarin e Listës Serbe, Millan Radoiçiq dhe serbët e tjerë që janë patriotë të dëshmuar dhe bartës të rezistencës ndaj pushtimit të veriut të Kosovës e Metohisë nga Albin Kurti”, ka thënë Lista Serbe.

Lista Serbe thotë se urrejtës të dëshmuar serbë kanë aktivizuar agjencitë e tyre me qëllim që të shtypin rezistencën e popullit serb duke etiketuar serbët e mendimit të lirë.

“Paralelisht me zbatimin e dhunës dhe represionit institucional nga forcat speciale të armatosura kundër serbëve në jug dhe në veri të Ibrit, urrejtës të dëshmuar serbë aktivizuan agjencitë e tyre me qëllim të shtypjes së rezistencës së popullit serb duke etiketuar serbët e mendimit të lirë që nuk pajtohen me dorëheqjen dhe tërheqjen para sulmit të hordhive nga Prishtina. Të gjithë serbët në Kosovë e Metohi, por edhe në mbarë Serbinë, kanë një matricë të qartë sipas së cilës, në momentin kur Prishtina keqtrajton popullin serb, kushdo që ngre zërin për të mbrojtur të drejtat dhe lirinë e popullit tonë do të denoncohet si kriminel”, ka thënë Lista Serbe.

Në njoftim, theksohet se nuk ka asnjë listë me ngjyrë të zezë, të kuqe apo ndonjë ngjyrë tjetër që mund të zvogëlojë respektin që ka nënkryetari i partisë sonë, Millan Radoiçiq, tek serbët në Kosovë.

“Për më tepër, këto lëvizje transparente dhe etiketime pa asnjë provë kundër tij, që janë në favor të Albin Kurtit për ta paraqitur veriun si vatër krimi, tregojnë gjithë nervozimin e atyre që për më shumë se dy dekada duan të shohin serbët në gjunjët, të asimiluar apo të dëbuar nga vatrat e tyre. Sikur të mos ishte e trishtueshme, do të ishte qesharake që në momentin kur forcat speciale shqiptare tundin me armët e gjata mbi fëmijët tanë, britanikët kujtojnë se mund t'i ndihmojnë fëmijën e tyre në Prishtinë duke u përpjekur të njollosin imazhin e serbëve të nderuar, por ata kurrë nuk do ta kujtojnë që të dënojnë keqtrajtimet e serbëve në Hoçën e Madhe, Leposaviq, Mitrovicë të Kosovës, Shtërpcë apo shumë vende të tjera nëpër Kosovë e Metohi”, thuhet në komunikatë.

Lista Serbe thotë se e kanë kuptuar mesazhin, por se përgjigja e tyre mbetet e njëjtë: “Nuk ka dorëzim, sepse nga këtu nuk ka kthim!”.