Lista Sërbe: Shkarkohen të gjithë drejtorët e emëruar politikisht në sektorët komunalë në veri

Lista Sërbe informon se kryekomunarët e katër komunave me shumicë sërbe në veri të Kosovës sot kanë firmosur shkarkimin e drejtorëve të emëruar më herët në sektorët komunalë.

“Kryekomunarët e Mitrovicës së Veriut Millan Radojeviq, i Zveçanit Dragisha Milloviq, i Zubin Potokut Millosh Peroviq dhe i Lleposaviqit Zoran Todiq, morën detyrën në këto komuna dhe urdhëruan shkarkimin e të gjithë drejtorëve të emëruar politikisht në sektorët komunalë”, bëhet e ditur në deklaratën e Listës Sërbe publikuar në Instagram. 

Emërimi i drejtorëve të rinj në sektorët komunalë, pritet të bëhet pas disa ditësh.

Kryekomunarët e rinj në të katër komunat e veriut, morën detyrën të premten pasi u betuan përpara këshilltarëve në kuvendet komunale. 

Ndërkaq, kryebashkiakët e rinj në hyrje të godinave komunale, ndeshën ambiente të drobitura dhe të shkatërruara.

Kryekomunari i Zveçanit Dragisha Milloviq u shpreh dy ditë më parë se në hyrje të ambjenteve të komunës u ndesh me pamje të tmerrshme ku uji rridhte nga të gjitha anët dhe se ekipet kompetente punojnë për riparimin e dëmeve.

Ai u shpreh se një numër veprash arti që ndodhen në zyrat e komunës, janë shkatërruar duke i lënë disa përdhe çka tregon për mungesën e kujdesit gjatë viteve të shkuara.

Situatë e ngjashme ndeshi dhe kryekomunari i Mitrovicës së Veriut Millan Radojeviq i cili tha se gjendja që ndeshi në godinat komunale është trishtuese, zhgënjyese dhe katastrofale”.