Lluçiq në Mitrovicën e Veriut: Qëndrojmë fuqishëm pas punonjësve tanë, pavarësisht presioneve të Kurtit

Drejtori i përgjithshëm i Telekomit të Serbisë, Vlladimir Lluçiq, gjatë vizitës së tij në Mitrovicën e Veriut, u shpreh se kompania që ai drejton qëndron fuqishëm pas punonjësve të saj, pavarësisht presioneve në rritje nga administrata e Albin Kurtit, e cila, sipas tij, përpiqet të vështirësojë punën e institucioneve serbe, përfshirë edhe MTS d.o.o.

Lluçiq vizitoi zyrën e MTS-së në Mitrovicën e Veriut, ku bisedoi me punonjësit dhe përdoruesit që ndodheshin në ambientet e kompanisë. Ai theksoi se kompania operon shumë mirë në Kosovë dhe mbulon mbi 30 mijë amvisëri.

“Sot po vizitoj punonjësit për t’u dhënë mbështetje personale dhe për të dërguar mesazhin se kompania jonë qëndron pas tyre. MTS d.o.o. operon shumë mirë, kemi mbi 250 të punësuar dhe u ofrojmë shërbime më shumë se 30 mijë amvisërive. Të gjithë jemi të vetëdijshëm që në dy vitet e fundit, kur u përpoqën të na mbyllin, ekziston presion nga administrata e Kurtit për të vështirësuar punën tonë. Meqenëse kjo administratë, në nervozizëm, ka nisur sulme ndaj institucioneve serbe, është e pritshme që do të përpiqen përsëri të na pengojnë, por jam plotësisht i sigurt – dhe për këtë arsye jam këtu – që do të parandalojmë çdo përpjekje për të dëmtuar funksionimin e kompanisë sonë nga ana e asaj administrate,” tha Lluçiq.

Ai shtoi se më 21 dhe 22 maj do të zhvillojë disa takime me administratën e re amerikane për të diskutuar zgjidhjen e kësaj situate dhe problemet që kompania ka në Kosovë.

“Do të rikthej edhe çështjen e licencës së tretë, që më në fund ta përmbyllim këtë proces dhe përdoruesit të përfitojnë sinjal 5G cilësor në të gjithë territorin e Kosovës dhe Metohisë. Duke pasur parasysh mbështetjen e shkëlqyer nga institucionet amerikane dhe evropiane për zhvillimin e 5G në Ballkanin Perëndimor, jam i sigurt që edhe kësaj here do të na ndihmojnë dhe se deri vitin e ardhshëm do ta përfundojmë këtë, sepse është në interes të të gjithëve,” theksoi Lluçiq.

Siç pohon ai, revolucioni në zhvillimin e 5G është i rëndësishëm, dhe në territorin e Kosovës, e vetmja kompani e aftë për ta zhvilluar atë është Mts.

“Ata e dinë shumë mirë këtë, dhe kjo është arsyeja pse administrata Kurti po përpiqet ta ngadalësojë ose të mos e japë kurrë licencën e tretë, dhe mendoj se kjo është një gjë realisht e pamundur. Në një moment të caktuar, ata do të duhet të lëshojnë një licencë të tretë”, përfundoi ai.

Ai u tha të gjithë përdoruesve se kjo kompani do të vazhdojë të funksionojë pa ndërprerje, duke u siguruar atyre një sinjal të pandërprerë, ndërkohë që përmirëson shërbimet.