Lonçar: Vendimi i turpshëm i Prishtinës për të mos më lejuar të vizitoj Kosovën

Autoritetet në Prishtinë nuk e kanë lejuar ministrin e Shëndetësisë Zlatibor Lonçar që të vizitojë Kosovën sot, njoftoi Ministria e Shëndetësisë serbe. Lonçar e cilësoi këtë vendim si të turpshëm dhe theksoi se vendimi i Prishtinës shkel drejtpërdrejt marrëveshjet në fuqi.

 “Është një vendim i turpshëm i institucioneve të përkohshme në Prishtinë që të mos më lejojnë mua, si ministër i Shëndetësisë i Qeverisë së Republikës së Serbisë, të vizitoj Kosovën dhe Metohinë dhe të vizitoj punëtorët shëndetësorë dhe institucionet mjekësore serbe që veprojnë në krahinën tonë jugore”, thuhet në njoftimin e Ministrisë së Shëndetësisë.

Lonçar thekson se qëllimi i vizitës nuk ishte i natyrës politike, por për të parë vetë funksionimin e sistemit shëndetësor serb në Kosovë, i cili, thotë ai, ofron të gjitha shërbimet mjekësore në mënyrë të barabartë për serbët dhe shqiptarët, duke pasur një qasje thellësisht humane dhe duke mos bërë asnjë dallim mbi asnjë bazë.

“Por për Albin Kurtin edhe në këtë shembull politika ka qenë para shëndetit dhe mirëqenies së njerëzve”, thuhet në deklaratën e ministrit.

Sipas tij, kjo ndalesë paraqet edhe shkelje të drejtpërdrejtë të marrëveshjeve në fuqi, duke qenë se plani i vizitës ka qenë vizita në Spitalin e Mitrovicës së Kosovës dhe Graçanicës, të shpallur me kohë dhe në përputhje me të gjitha rregulloret në fuqi dhe të dakorduara.

“Ndërsa Albin Kurti mbështet drejtpërdrejt dhe pa mëdyshje protestat në Serbi, ai njëkohësisht po zbaton ndalesa të tilla thellësisht anti-civilizuese, të cilat dëmtojnë drejtpërdrejt normalizimin e marrëdhënieve. Megjithatë, një gjë është e sigurt, as Prishtina dhe as Kurti nuk do të mund të na pengojnë kurrë që të ndihmojmë popullin tonë në Kosovë dhe Metohi, për tju ofruar shërbime shëndetësore dhe të tjera për të gjithë dhe ne ofrojmë ndihmë dhe shërbime mjekësore si për serbët ashtu edhe për shqiptarët dhe për të gjitha komunitetet e tjera, sepse për ne nuk është çështje politike por e kodit dhe përgjegjësisë dhe ne gjithmonë do të udhëhiqemi nga parime të tilla”, theksohet në deklaratë.