Millivojeviq: Kurti nuk ka ndërmend të ndalet në përpjekjet e tij për të pushtuar veriun

Ish-diplomati Zoran Millivojeviq beson se kryeministri i Kosovës Albin Kurti nuk ka ndërmend të ndalet në lëvizjet e tij të dhunshme dhe të pamenda në përpjekje për të pushtuar veriun, shkruan Kurir.

Millivojeviq thotë se Kurti dëshiron të konfirmojë shtetësinë e Kosovës në afat të shkurtër, me përdorimin e forcës.

“Është e sigurt se Kurti po zbaton strategjinë e tij politike për pushtimin e Kosovës në tërësi, duke përfshirë edhe mënyrën e dhunshme. Ai dëshiron të konfirmojë shtetësinë e Kosovës në afat të shkurtër, me përdorimin e forcës. Duke filluar nga shpallja e organizatave inekzistente si terroriste, përmes vendimeve të këshilltarëve jolegjitimë etj., gjithçka është pjesë e të njëjtit mozaik që duhet të zbatojë sovranitetin e plotë të Prishtinës. Në të njëjtën kohë, ai ka mbështetjen e heshtur të qendrave të fuqisë perëndimore, që shihet në faktin se nuk ka vullnet politik për, le të themi, aplikimin e forcës së KFOR-it, që do të parandalonte represionin dhe pogromin e mëtejshëm të popullit serb në veri”, thekson Millivojeviq.

Ai shton se në thelb as masat që kanë vendosur kundër Prishtinës nuk e pengojnë Kurtin që të krijojë një mjedis frike, shpejt dhe me efikasitet dhe t'u kujtojë serbëve të dorëzohen dhe të largohen.

Profesori Mirosllav Bjegoviq, dekani i Fakultetit të Studimeve të Sigurisë, vlerëson se Kurti dëshiron ta pushtojë veriun me metoda terroriste.

“Natyrisht, ai dëshiron të shpikë një arsye për hyrjen e të ashtuquajturve të ushtrisë së Kosovës në veri me pretekstin e luftimit të terrorizmit, por  nuk e kupton se do të jetë një rrugë pa kthim për formimin e tij ilegal, i krijuar nga pjesëtarët e UÇK-së terroriste, të cilësuar si të tillë nga SHBA në vitin 1999. Kjo tentativë e rreme dhe e rrezikshme për sigurinë për ta cilësuar veriun terrorist nuk e ka përkrahur asnjë institucion relevant ndërkombëtar, sepse ata e dinë shumë mirë situatën në terren dhe vetë Kurti, i cili dëshiron të provokojë një konflikt të armatosur në të cilin do të përpiqet të tërheqë Serbinë në luftë me NATO dhe pas kësaj ta shpallin veriun komuna shqiptare”, thekson Bjegoviq.

Ai tregon se Kurti nuk e kupton që data e përdorimit të tij është pothuajse në fund, sepse ai është burimi i destabilitetit në Ballkanin Perëndimor.