Misioni i OSBE-së: Çdo vendim për kthimin e zyrtarëve në detyrë arsyetohet nga IPK dhe Prokuroria

Misioni i OSBE-së në Kosovë është në dijeni për kthimin në punë të dy policëve që ishin suspenduar nën dyshimin për përfshirje në rastin e rrahjes së serbit Nenad Rashkoviq, por thekson se çdo vendim për kthimin e zyrtarëve në detyrë, si dhe bazën për një vendim të tillë, e arsyetojnë Inspektorati Policor i Kosovës dhe Prokuroria.

“Misioni i OSBE-së në Kosovë është në dijeni të raportimeve të mediave se dy zyrtarë të Policisë së Kosovës, të cilët më herët ishin suspenduar për shkak të akuzave për keqtrajtimin e Nenad Rashkoviqit, janë kthyer në detyrë. Misioni kupton se Inspektorati Policor e ka përfunduar hetimin dhe ia ka dërguar raportin përfundimtar Prokurorisë”, thuhet në përgjigjen ndaj pyetjes së Kosovo online lidhur me vendimin që dy policët e suspenduar të kthehen në detyrë në stacionin policor në Mitrovicën e Veriut.

Misioni i OSBE-së thekson se hetimi sipas detyrës zyrtare i Institucionit të Avokatit të Popullit është në vazhdim dhe se është në kontakt me këtë institucion lidhur me këtë çështje.

“Çdo vendim për kthimin e zyrtarëve në detyrë, si dhe bazën për një vendim të tillë, e arsyetojnë Inspektorati Policor dhe Prokuroria. Misioni beson se vendime të tilla janë në përputhje me vlerat dhe standardet e sjelljes që priten nga policët që u shërbejnë të gjitha komuniteteve”, shtohet në përgjigje.

Shefi i Njësisë për Planifikim Operacional dhe Vlerësim, Erduan Baliqi, konfirmoi dje për Kosovo online se dy policët, të suspenduar më herët nën dyshimin për përfshirje në rastin e rrahjes së Nenad Rashkoviqit nga fshati Dren pranë Zubin Potokut, janë kthyer në punë.

“Ka skaduar masa e suspendimit të tyre, të cilën më herët e kishte shqiptuar Inspektorati Policor i Kosovës. Për të gjitha informacionet shtesë duhet të kontaktoni IPK-në në Prishtinë”, tha Baliqi.

Serbi Nenad Rashkoviq nga fshati Dren u plagos rëndë më 11 gusht, pasi, siç ka deklaruar ai, u rrah nga policët e Kosovës.

Rashkoviq u pranua në QKS “Kosovska Mitrovica”, por për shkak të rëndësisë së lëndimeve të marra u transferua për trajtim në Qendrën Klinike të Serbisë në Beograd.

Për shkak të akuzave të tij, Inspektorati Policor i Kosovës nisi hetim sipas detyrës zyrtare dhe më pas i rekomandoi Policisë së Kosovës suspendimin e dy policëve të Drejtorisë Rajonale të Policisë në Mitrovicën e Veriut, nën dyshimin për veprën penale “keqtrajtimi gjatë ushtrimit të detyrës zyrtare ose autorizimeve publike”.