OSBE: U bëjmë thirrje të gjitha institucioneve të vazhdojnë përpjekjet për gjetjen e personave të zhdukur

Misioni i OSBE-së njoftoi se, në Ditën Ndërkombëtare të Viktimave të Zhdukjeve me Forcë, u bashkohet familjeve në përkujtimin e më të dashurve të tyre që vazhdojnë të konsiderohen të zhdukur.

Siç theksohet në postimin në rrjetin social “X”, përpjekjet e fundit për gjetjen e mbetjeve mortore në Zubin Potok tregojnë rëndësinë e punës së vazhdueshme për gjetjen, zhvarrosjen dhe identifikimin e personave të zhdukur, gjë që, sipas tyre, është thelbësore për zbardhjen e së vërtetës dhe avancimin e drejtësisë.

“U bëjmë thirrje të gjitha institucioneve përkatëse t’i vazhdojnë këto përpjekje dhe të bashkëpunojnë plotësisht përmes shkëmbimit të informacioneve, kërkimeve, gjetjes së mbetjeve mortore dhe ekzaminimeve mjekoligjore, në mënyrë që familjet të marrin më në fund përgjigjet që i presin prej shumë kohësh”, njoftoi OSBE-ja.

Me rastin e Ditës Ndërkombëtare të Viktimave të Zhdukjeve me Forcë, UNMIK-u njoftoi se më shumë se 1.500 persona vazhdojnë të konsiderohen të zhdukur, 27 vjet pas konfliktit në Kosovë, duke theksuar se viktimat dhe familjet e tyre duhet të mbeten në qendër të përpjekjeve për zbardhjen e fatit të tyre.