Pelegrinët nga manastiri i Banjskës kaluan Jarinjën dhe u nisën për në Novi Sad

Një grup prej 30 pelegrinësh nga Novi Sadi, të cilët gjatë incidentit të djeshëm ishin të rrethuar në manastirin e Banjskës, ku edhe kaluan natën, kaluan pikëkalimin Jarinjë dhe u nisën më tej në drejtim të Serbisë.

Siç raporton reporteri i Kosovo online, ata kanë udhëtuar për në pikëkalimin Jarinjë të shoqëruar nga Policia e Kosovës dhe EULEX-i.

Pas një kontrolli të shkurtër, ata u larguan nga Kosova.

Situata në Jarinjë është e pandryshuar, automjetet e udhëtarëve po largohen nga Kosova, por ende nuk lejohet hyrja nga Serbia, as për këmbësorët.

Familje të shumta përcjellin studentë dhe të afërm nga Kosova me autobus deri në pikëkalim, prej nga kalojnë në Serbi në këmbë.