Petkoviq: Kurti vazhdon grabitjen e tokës së familjeve serbe

Drejtori i Zyrës për Kosovë e Metohi, Petar Petkoviq tha se me vendimin e sotëm “të ashtuquajturës Qeverisë në Prishtinë për vazhdimin e shpronësimit të tokës serbe në komunën e Leposaviqit dhe Zubin Potokut, Albin Kurti, ka ndërmarrë një hap të ri me qëllim të destabilizimit të situatës në terren dhe ka treguar për të disatën herë se dëshiron konflikte dhe luftë”.

Në një komunikatë, Drejtori i Zyrës për Kosovë e Metohi thekson se është e qartë se Kurti nuk është në kërkim të qetësimit të tensioneve, dialogut dhe normalizimit të marrëdhënieve, por me presione të reja institucionale dhe kërcënime për mbijetesën dhe qëndrimit të popullit serb, ai dëshiron t'i dëbojë serbët nga vatrat e tyre shekullore.

“Me vendimin e njëanshëm, të paligjshëm dhe të kundërligjshëm për shpronësimin e tokës serbe në Leposaviq dhe Zubin Potok, Kurti vazhdon të vjedh tokën e familjeve serbe, për të ndërtuar ilegalisht të ashtuquajturat baza dhe fortifikime të tij ushtarake dhe policore në veri të Kosovës e Metohisë. Tani është e qartë si dita se dëgjimet e vonuara publike të organizuara në këto dy komuna në veri në fillim të vitit ishin vetëm një sharadë e drejtuar nga Prishtina për komunitetin ndërkombëtar dhe një përpjekje për të kënaqur formën, dhe jo shqetësim për sundimin e ligjit dhe të drejtat e serbëve që jetojnë në këto zona”, tha Petkoviq.

Petkoviq shton se është e qartë për të gjithë se njerëzit, toka e të cilëve është nën sulm nga pushtuesit nga Prishtina, do t'i kundërshtojnë veprimet e tilla me të gjitha mjetet paqësore dhe legjitime dhe nuk do të shikojnë në heshtje se si i marrin trashëgiminë të tyre.

“Zyra për Kosovë e Metohi, së bashku me përfaqësuesit tanë në terren, popullin, përfaqësuesit ligjorë, sektorin civil, do të vazhdojnë të luftojnë për interesat legjitime të popullit tonë dhe për këtë lëvizje të re, të njëanshme dhe të paligjshme të Kurtit do t'i informojmë të gjithë përfaqësuesit dhe misionet relevante ndërkombëtare që veprojnë në hapësirën e Kosovës e Metohisë, si dhe ndërmjetësit në dialog, Miroslav Lajçak, për të parandaluar këtë lloj dhunë ligjore dhe uzurpimi nga Kurti”, ka përfunduar Petkoviq.