Petkoviq me Bocan-Harçenkon: Përparim i rëndësishëm në çështjen e personave të zhdukur, por nevojitet një hap konkret në formimin e AKS

Drejtori i Zyrës për Kosovën dhe Metohinë, Petar Petkoviq, u takua sot me ambasadorin e Rusisë në Serbi, Aleksandar Bocan-Harçenko, të cilin e njohu me situatën politike dhe të sigurisë në Kosovë, si dhe me raundin e fundit të dialogut mes Beogradit dhe Prishtinës në Bruksel.

Petkoviq vuri në dukje se pas takimeve të shumta në Bruksel është bërë një hap i rëndësishëm sa i përket zbatimit të Deklaratës për personat e zhdukur dhe se është mbajtur takimi i parë i Komisionit të Përbashkët për personat e zhdukur, njoftoi Zyra për KeM.

Ai theksoi se edhe kësaj radhe gjatë dialogut ka kërkuar hapa konkretë dhe të prekshëm lidhur me formimin e Asociacionit të komunave serbe, duke vënë në dukje se Prishtina vazhdon me veprime kundërligjore, të njëanshme dhe eskaluese, me të cilat rrezikon mbijetesën, paqen dhe sigurinë e popullit serb në Kosovë.

Veçanërisht, ai përmendi shembuj të shumtë të dhunës institucionale dhe fizike dhe të terrorit që, sipas tij, ushtrohen nga Prishtina, duke shkelur madje edhe të drejtat themelore të njeriut të popullit serb.

Petkoviq theksoi se është e rëndësishme që bashkësia ndërkombëtare të kuptojë rreziqet e shumta që burojnë nga paralajmërimet e Prishtinës për zbatimin e ligjit për të huajt dhe për automjetet, si dhe të ndërmarrë hapa konkretë në këtë drejtim. Ai porositi se Beogradi do të vazhdojë të luftojë përmes të gjitha kanaleve diplomatike për të drejtat legjitime të popullit serb në Kosovë, si në këto ashtu edhe në çështje të tjera të rëndësishme me rëndësi vendimtare për jetën dhe mbijetesën e popullit serb.

Drejtori i Zyrës për KeM i shprehu bashkëbiseduesit mirënjohje për qëndrimin parimor të Federatës Ruse lidhur me Kosovën dhe për respektimin e sovranitetit dhe integritetit territorial të Serbisë, si dhe të Rezolutës 1244 të Këshillit të Sigurimit të OKB-së, thuhet në njoftim.