Rakiq: Kërkojmë nga presidenti Vuçiq që të ndërpresë dialogun deri në tërheqjen e kryetarëve të Kurtit dhe forcave speciale

Në një konferencë për media në Mitrovicën e Veriut, pas inkursionit të djeshëm të dhunshëm të forcave speciale të Kurtit dhe pushtimit të komunave të Zveçanit, Leposaviqit dhe Zubin Potokut dhe dhunës në të cilën ishin të lënduar më shumë se 10 serbë, Kryetari i Listës Serbe, Goran Rakiq, ka bërë të ditur kërkesat e popullit serb nga Kosova të cilit nga presidenti Aleksandar Vuçiq i kërkohet ndërprerja e dialogut deri në tërheqjen e “kryetarëve fiktivë të Kurtit” nga veriu i Kosovës dhe deri në tërheqjen e forcave speciale ROSU.

Gjatë fjalimit të tij, Rakiq përcolli shqetësimet e popullit serb dhe renditi në mënyrë shteruese të gjithë shembujt, siç tha ai, të terrorit të regjimit të Kurtit ndaj popullit të pafajshëm serb, i cili kulmoi me inkursionin e djeshëm të paligjshëm dhe të dhunshëm me gaz lotsjellës, bomba shokuese dhe arma të gjata në komunat në veri të Kosovës.

“Duke pasur parasysh të gjitha lartpërmendur, ne, përfaqësuesit politikë të popullit serb nga Kosova dhe Metohia, si dhe i gjithë populli serb, kërkojmë nga presidenti ynë Vuçiq dhe nga e gjithë lidershipi shtetëror që të pezullojnë menjëherë çdo pjesëmarrje të mëtejshme të Beogradit në dialog me Prishtinën. Ne besojmë se çdo bisedë e mëtutjeshme me Prishtinën në rrethanat aktuale është jo vetëm e palogjikshme, por edhe kundërproduktive. Me fjalë të tjera, vazhdimi i bisedimeve me regjimin e Kurtit pas terrorit të djeshëm do t'i dërgonte atij një mesazh se një veprim i tillë është mjaft fitimprurës, sepse në çdo mundësi të deritanishme i mundëson konsolidimin e rezultateve të veprimeve të tij të kundërligjshme. Nga kjo perspektivë, në veçanti kërkojmë nga lidershipi shtetëror që vendimi për ndalimin e përkohshëm të pjesëmarrjes së zyrtarëve shtetërorë në dialog të hiqet vetëm kur Prishtina tërheq të gjitha forcat speciale të policisë ROSU nga veriu i Republikës së Kosovës dhe tërheq të gjitha organet dhe forcat e saj dhe largohet nga ndërtesat e administratave komunale në veri të Kosovës e Metohisë”, tha ai.

Rakiq shtoi se serbët nga veriu i Kosovës më herët, kur ishin larguar nga institucionet, u kishin thënë qartë të gjithëve se cilat ishin kushtet e kthimit.

“Veprimet armiqësore të Albin Kurtit vazhduan edhe pas largimit nga institucionet. Kurti vazhdimisht dhe çdo ditë kryen represion kundër popullit serb”, tha Rakiq.

Ai falënderoi edhe komunitetin ndërkombëtar që, siç tha, “e ka treguar dje fytyrën e vërtetë dhe hipokrizinë”.

“Dje shkuam në Beograd për të dërguar mesazh paqeje, nuk u kthyem kur filluan incidentet sepse morëm garanci nga përfaqësuesit ndërkombëtarë se KFOR-i do të qëndrojë në mes të popullit dhe njësive speciale dhe kjo nuk ndodhi. I falënderojmë që treguan se sa hipokritë janë. Ne nuk do të shkojmë askund prej këtu, në asnjë tubim. Ne do të qëndrojmë me njerëzit tanë", tha Rakiq.

Kryetari i Listës Serbe shtoi se do të kërkojë nga KFOR-i që punëtorët komunalë të kthehen në vendet e tyre të punës.