Stoltenberg: Besoj se propozimi për BKS-në mund të jetë një rrugë përpara në dialog

Sekretari i Përgjithshëm i NATO-s, Jens Stoltenberg sot, në një konferencë për shtyp në Bruksel pas takimit të ministrave të jashtëm të Aleancës, përsëriti se propozimi për Bashkësinë e Komunave Serbe mund të jetë rruga përpara në gjetjen e një zgjidhjeje dhe arritjen e progresit në dialogun ndërmjet Beogradi dhe Prishtina.

Stoltenberg ka nënvizuar edhe një herë se në Kosovë gjatë muajve të fundit janë parë incidente të rënda.

“Sapo vizitova Kosovën dhe ajo që pamë këtë pranverë ishte një sulm ndaj paqeruajtësve të NATO-s. 93 ushtarë të NATO-s u plagosën, disa prej tyre me plagë që të ndryshonin jetën dhe kjo është krejtësisht e papranueshme”, tha Stoltenberg.

Ai kujtoi edhe ngjarjet në Banjskë, ku humbën jetën katër persona.

“Kjo nënvizon sfidat me të cilat përballemi në Kosovë dhe rëndësinë e deeskalimit nga të gjitha palët, të përmbahen nga veprimet që mund të rrisin më tej tensionet dhe të përmbahen nga çdo retorikë nxitëse që mund të rrisë tensionet. Ky ishte mesazhi im në takimet në Prishtinë dhe Beograd”, tha Stoltenberg dhe shtoi se Kosova është shembull i bashkëpunimit të mirë ndërmjet BE-së dhe NATO-s.

“Ne kemi shtuar më shumë trupa të NATO-s në praninë tonë në Kosovë pas ngjarjeve të fundit, dhe tani janë të pranishëm rreth 5000 trupa të NATO-s. Besoj se propozimi i BKS-së mund të jetë rruga përpara për të gjetur një zgjidhje dhe për të bërë përparim në dialog me ndihmën e BE-së”, tha Stoltenberg.